Si Palui : Tikar Kalambu

BANJARMASINPOST.CO.ID - DARI bubuhan Palui sakawalan tatinggal Garbus haja nang balum baisian anak-bini. Palui haja sudah talu ikung jurutnya, Tulamak tinggal mahadang meladum haja lagi bininya. Nang ngarannya kawal samuak saliur, Palui taumpat sadih wan kawalnya itu. Apalagi inya rancak banar malihat Garbus bahanu taungut saurangan pina marista.

"Ikam sudah tahu alasanku Lui ai. Aku balum kawin ini kadanya karna kada handak tapi karna masih marasa batanggungjawab wan ading-ading nang masih halus," ujar Garbus manjawab wayah ditakuni Palui kanaapa inya baluman bajuduh jua.

"Aku paham alasan ikam, tapi pikirakan diri ikam saurang nang sudah mulai bahuban karna bila kawin talambat ikam rugi kada tarasani nikmat dunia,lalu kada cagar ada katurunan," ujar Palui.

"Tapi ada jua alasan lain nang kada kusambat," sahut Garbus.

"Alasan napa Bus?, kalu nang kaya ikam kisahakan dahulu kada sanggup babini karna ikam pina mambibinian, jangan hawatir karna aku ada baisian akar wan lungsurnya," ujar Palui.

"Aku nurmal haja Lui ai.Nang jadi pikiranku adalah aku samasakali kadada baisian duit gasan jujuran ujarnya," ujar Garbus.

"Kalu sual jujuran jangan dipikirakan, aku ada ilmunya jangankan manjujur malah kita dijujur urang,." ujar Palui.

"Ikam tahu kalu wayahini panduduk kita kabanyakan bibinian, jadi artinya bubuhannya marabutakan lalakian kalu pina kada kabagian. Aku sanggup mancariakan ikam bini, asal jangan tapi mamilih banar karna banyak nang batawar wan aku," ujar Palui pulang.

Imbah bapander wan Garbus tadi, Palui langsung ka rumah Iyam anak julak Marintim karna sidin ada baisian anak balu.

"Ui julak.., ulun ada maksud handak umpat maandak kawal mangawani anak sampiyan, ngarannya Utuh Garbus," ujar Palui wan julak Marintim.

"Kalu kawal ikam itu bujur-bujur handak, aku katuju haja tapi harus dimaklumi karna anakku itu biasa balakian tapi kada sampat bakumpul sakalambu," ujar sidin.

"Lalu kaya apa syaratnya?" ujar Palui.

"Kita kada basyasyaratan barat, bila hakun sama hakun jadilah.Syaratnya ringan banar kaya urang jua, bila urang biasanya sajadah wan mukena maka anakku ini cukup tikar wan kalambu haja," ujar julak Marintim babasa-basi.

"Kalu cuma itu syaratnya, kita bajadian," ujar Palui.

"Nah Bus, ikam kuandak wan si Mariam, umanya sudah basadia dan syaratnya sidin hanya minta tikar wan kalambu. Supaya jangan talambat, minggu kaina kita langsung ba-antaran, tulung siapakan tikar wan kalambu," ujar Palui.