Si Palui

Si Palui : Bajual Pundut

“Aku baulah wan manjual pais, ba-bungkuh, pupudak, lapat, buras, lalampar, nasi pundut, nang pabungkusnya daun pisang balipat-lipat"

Dok Banjarmasinpost.co.id
Si Palui : Bajual Pundut 

BANJARMASINPOST.CO.ID - HARI itu Garbus wan bininya duduk baristaan di palataran kalihatan kaduanya basakit hati banar.

“Hari Ahad kaina, aku bulik haja ka pahuluan, abahnya-ai,” ujar nang bini. "Aku kada tahan lagi hidup di Banjar ini. Pancaharian kita magin susah. Kaparluan sahari-hari makin balarang. Ba-ulah wan bajualan wadai kada bapayuan.”

“Aku jua ma-ujik uyuh, apa lagi harga binsin kahada turun-turunnya,” ujar Garbus manimpali pandir, tambah marista.

"Sudah kuturuti papadah Kai Tuganal. Kita ini sudah diramalkan ulih sidin, sabaiknya kita bausaha badagang barang-barang nang balimpat-lipat haja. Hujungan atawa labanya pasti balipat jua, ujar sidin.

“Buktinya napa?” takun nang bini handak maniwas.

"Iya umanya-ai, sudah kucuba badagang kajang nang ujungnya balipat ampat, sampai lima lipat. Satumat haja badagang kajang, aku ampih, malahan rugi,” ujar Garbus takuringis.

“Nang kaya itu jua aku,” ujar nang bini manyahut.

“Aku baulah wan manjual pais, ba-bungkuh, pupudak, lapat, buras, lalampar, nasi pundut, nang pabungkusnya daun pisang balipat-lipat, sasuai ramalan kai Tuganal. Tapi satumat haja laris, lalu kada payuan lagi. Akhirnya kita rugi, lalu ampihan. Kahada mantuk puku, abahnya-ai,” ujar bini Garbus, banyu matanya kilir-kiliran.

Banjarmasin Post edisi Kamis (16/4/2020).
Banjarmasin Post edisi Kamis (16/4/2020). (Dok Banjarmasinpost.co.id)

“Sabar haja umanya-ai” ujar Garbus mahibur. "Tuhan baluman mambari rajaki balabih gasan kita. Kaina pasti haja bagian rajaki nang banyak, umanya-ai. Ujar tuan guru tuha di masigit samalam, kita ini harus sabar, tawakkal, tatap bausaha wan badoa, umanya-ai. Kita jangan jua maniwas papadah Kai Tuganal. Tuhan jua nang manantukan,” ujar Garbus nang kaya ustad.

“Tapi....ui abahnya,” ujar nang bini pulang. “Aku hiran wan hiri kapada si Aluh Mungkal di subarang itu. Inya ba-ulah wan manjual pundut jua. Kukira, kualititnya, rasanya kita kada kalah. Tapi inya tatap suksis bajualan pundut hingga mayahini. Pada hal kita rugi wan bangkrut. Iya kalo?”

“Nah...itu ada rahasianya umanya-ai. Inya salajur bajual pundut nang satabul”.

“Haw....astaga!” ujar bini Garbus tanganga.

“Lamun ikam kada parcaya, takunakan pada Katua RT kita, abang Palui," ujar Garbus sambil manyirit Palui nang tabalujur datang mailangi karena inya mandangar habar bahwa Garbus wan bininya handak bulik ka pahuluan, gara-gara rugi badagang.

“Ui....dangsanakku kaduanya, jangan parcaya pada ramalan saraba ujung balipat kada usah batitiwasan. Tataplah bajualan, ma-ujik atawa mambalantik, insya Allah Tuhan mambari kita rajaki. Asal haja jangan badagang pundut nang satabul,” ujar Palui.

“Jauhkan bala....jauhkan bala!”, sahut bini Garbus dan diaminkan ulih lakinya. (bpost/aan)

Editor: Didik Trio
Ikuti kami di
KOMENTAR

BERITA TERKINI

© 2020 TRIBUNnews.com Network,a subsidiary of KG Media.
All Right Reserved