Si Palui

Si Palui : Takutan Ka Puskesmas

Palui mengatakan jera ke rumah sakit karena sakit karena hendak di suntik 5 kali sehari.

Dok Banjarmasinpost.co.id
Si Palui : Takutan Ka Puskesmas 

Editor: Didik Triomarsidi

BANJARMASINPOST.CO.ID - SUDAH tiga hari ini, Palui kada sing kaluaran pada rumah. Padahal, biasanya, saban hari pasti ada mancungkung di pus kamling lawan kakawalannya.

Ujar habar, Palui tiga hari ini garing mariap dingin kada sing ampihan. Ujar habar pulang, inya basalimputan haja di kamar lawan tapih.

Mandangar kawan garing, Garbus, Tulamak wan Tuhirang tulakan ka rumah Palui mailangi. Sakalinya, habar Palui di kamar basalimputan tapih haja itu kada salah. Bahkan, tapihnya sampai tiga lapis.

“Bah, bangat banar pinanya garing ikam nih, Lui lah, sampai tapih tiga lapis,” jar Garbus mambuka pamanderan. “Jaka ikam baubat ka puskesmas. Kalu pina garing ikam nih babahaya, kalu-kalu demam bardarah kah, atau napa kah,” jar Garbus pulang.

“Ikam nih, Bus, kaya kada tahu ha. Palui nih kan kada wani lalu-lalu lawan jarum suntik. Makanya, aku yakin inya kada mau dibawa ka puskesmas,” jar Tulamak manimpali.

“Aku sabujurannya kulir jua bila ka puskesmas. Bukan kada wani, tapi kulir malihat patugasnya nang marangut tarus bila malayani,” jar Tuhirang.

“Iih, aku gin jua, mun kada parlu banar kada ka sana baubat. Mun mariap dingin sadikit ha kada ai dahulu. Biar kada bayar bila baisi KTP, tapi amun marangut asa ngalih ai,” jar Garbus manambahi akan.

“Mun diibaratakan, marangutnya kaya siapa?" ujar Palui.

“Kaya si Isah, tukang warung. Pas kita datang inya takurihing, tapi pas kita bahutang, inya marangut. Nah, nang kaya itu rangutannya,” jar Tuhirang mancuntuhakan.

Banjarmasin Post edisi Jumat (17/4/2020).
Banjarmasin Post edisi Jumat (17/4/2020). (Dok Banjarmasinpost.co.id)

“Tapi, biar nang kaya itu, kawan kita nih musti dibawa ka puskesmas. Kalu pina kanapa-napa,” jar Garbus mamadahi. Imbah itu, Palui akhirnya dibawa ka puskesmas.

Sakalinya, padiran Garbus, Tulamak wan Tuhirang tadi kada salah. “Ikam kada kawa takurihing sadikit kah?” jar Palui managur patugas puskesmas nang mamariksanya.

Mandangar Palui baucap nang kaya itu, maginnya ai, patugas itu marangut. “Pian nih handak ku suntik lima kali kah sahari,” jar patugas puskesmas.

Mandangar pandiran patugas tadi, Palui babisik wan Garbus “Bus, hari ini pamulaan wan paampihan aku ka puskesmas. Baik ka panambaan, ada jua takurihing, biar bayar,” jar Palui.

“Bah, kada karna itu haja ikam jara. Ikam takutan disuntik, itu alasan nang lain kalu,” jar Garbus. (bpost/ire)

Editor: Didik Trio
Ikuti kami di
KOMENTAR

BERITA TERKINI

© 2020 TRIBUNnews.com Network,a subsidiary of KG Media.
All Right Reserved