Si Palui: Kacamata Kaur

Editor: Syaiful Akhyar

BANJARMASINPOST.CO.ID - Kada karasaan Palui makin batuha, walaupun inya marasa kadada parubahan.

Tapi nang musti awak makin babungkuk wan rambut di kapala makin mamutih.

Kaya itu jua mata pina makin bakaur kada kawa lagi mambaca.

Karna kada paminanduan wan rancak tasalah itulah maka bininya manyuruh Palui supaya bakacamata haja.

"Pian ka ai baiknya bakacamata haja, supaya jangan tasalah panglihat maklum sudah kaur," ujar bininya.

"Aku akur haja ding ai, supaya panjanak makin tarang wan supaya kalihatan makin aksi," sahut Palui.

"Biar batambah aksi kadada jua nang cagar handak wan sampiyan karna samunyaan sudah saraba lamah," sahut bininya himung

Tulak ai Palui ka duktur bapariksa mata lalu dapat risip kacamata. Alhamdulillah sudah bapanglihat saraba ganal ujarnya.

Pilihakan kacamatanya nang dua warna supaya kawa dipakai siang malam ujar Palui.

Imbah bulik ka rumah galu banar bininya kanapa maka manukar kacamata nang kaya anak muda haja.

Kacamata sampiyan itu pina kaya pamain band urang picak haja ujar bininya sarik.

"Tapi nang musti panglihatku wayah ini disamping makin batarang, ikam ding ai pina makin babungas, awak makin bakancang kaya wayah kita hanyar kawin dahulu," ujar Palui.

"Kada usah ma ambung, kalu handak malam kaina kubari haja," sahut bininya.

"Ini nah aku asa gagaringan awak abahnya ai kalu kawa tulung pang ikam tulak ka pasar manukar iwak gasan makan tangah hari ini," ujar bininya manyuruh.

"Kalu dahulu kada hakun disuruh karna alasan mata kada tapi hawas maka imbah bakacamata ini kira-kira kadada alasan lagi," ujar bininya pulang.

"Akur haja aku disuruh kapasar salajur ba agak kacamata wan kakawalan," ujar Palui.

Lalu inya maambil sapida mahalunyur ampah ka pasar.

Imbah sampai di pasar Palui langsung ka bak iwak, malihat iwak pina ganal-ganal kalacungan lalu batakun:

"Barapa iwak ini satangguk?" ujarnya.

"Anam ribu rupiah samunyaan," ujar nang bajual.

"Kutukari samunyaan, bungkusakan baik-baik," Palui lalu mambayari langsung bulik kahimungan karna marasa kamurahan iwak haruan ganal-ganal kaya pagalangan itu haraganya cuma anam ribu rupiah haja padahal biasanya nang kaya itu paling murah sabalas ribu sakilunya.

Imbah sampai di rumah Palui malihatakan iwak haruan tukarannya itu lalu bapadah haraganya murah banar.

"Sampiyan talalu-lalu banar, kanapa iwak saluang nang kaya kalingkingan ini maka ditukar maanam ribu rupiah!?" ujar bininya bamamai manyariki Palui.

"Kalu aku manukar saluang kaya ini haraganya paling-paling dua ribu rupiah. Ini lain haruan tapi iwak saluang abahnya ai," ujar bininya.

"Hau.. tadi panglihatku kaya iwak haruan ganal-ganal," sahut Palui.

"Buka kacamata sampiyan nang bakaca balur itu, itihi bahimat ini iwak haruan ataukah iwak kalatau ujar bininya.

"I’ihlah bujur aku tatukar iwak saluang. Ini kada salahku umanya ai tapi salah kacamata kaur ini," ujar Palui sambil minta maaf wan bininya. (mht/repro)