Si Palui

Si Palui: Bacalon Anggota DPR

Parak pamilu kaya wayahini, Palui takuling kapala melihat jalanan di kampungnya nang mahibak lawan atribut partai. Nang maulah inya kada habis pikir

Editor: M.Risman Noor
Si Palui: Bacalon Anggota DPR
reza
si palui bacalon anggota DPR

BANJARMASINPOST.CO.ID - Parak pamilu kaya wayahini, Palui takuling kapala melihat jalanan di kampungnya nang mahibak lawan atribut partai. Nang maulah inya kada habis pikir saikung kawal sarantang-saruntungnya, Garbus, maka umpat jua bacalon.

“Lihati gambarnya ngitu, imbahanu maras imbahanu muar jua malihat. Untung dipasang di muka rumahnya sorang, jaka di muka TK tu kira-kira banyak kananakan nang kapidaraan gara-gara talihat gambar Garbus ngitu,” ucap Palui menyambati.

“Hi-ih. Tumatan bahari kada pernah umpat di partai, pas pemilu ngini timbul umpat becalon. SMA haja sampai lima tahun hanyar tamat. Jaka tarusakan bahuma aja ada jua kolehan,” ujar Tulamak menambahi.

Kada lawas bepandiran tang cungul Garbus di warung Acil Isul wadah buhan Palui dudukan saban malam tu.

“Ham panjang umur timpakul ngitu. Hanyar dipandir cungul urangnya,” ujar Tulamak.

“Selamat malam semuanya,” ujar Garbus sambil melambai. “Cil Ulahakan kupi susu. Pakai cangkir halus aja,” ujar Garbus lawan suara nang diulah-ulah model kaya pejabat.

“Muha nyawa Bus ai. Model pejabat bujuran aja sudah. Kutawak lawan sepatu ladung ngini jua ne,” ujar Palui garigitan. Malihat ngitu Tulamak sigap meragap menyabari Palui.

“Lui, Mak, aku ka sini ni handak minta tolong nah. Pamilu kaina tolong buhan ikam sarumahan mamilih aku lah,” pinta Garbus.

“Akur haja, tapi aku handak tahu dahulu apa gerang nang maulah ikam umpat bacalon,” ujar Palui.

“Ikam kada membaca kah tulisan di gambar ku tu. Handak membangun Banua. Kuusahakan labih baik lagi bila aku jadi anggota DPR kaina,” ujar Garbus.

“Cah buhung. Pahumaan habis tasanda sudah gasan modal becalon,” ujar Tulamak umpat menumpalak.

Imbah ketuhukan disambati kakawalannya tu akhirnya kada tahan jua Garbus. Lalu baucap ai inya.

“Iih. Ada pang niat ku nang lain,” ucap Garbus lamah. Pina membari maras.

“Aku tu handak merasai jua kaya pejabat nang baduit. Satumat bejalanan ka Jawa, ka Sumatera, sampai ka luar negeri. Tumatan bahari aku kada bisa bejalanan jauh, haur di kampung aja kaya iwak dalam kulam, karuh ha pulang banyunya,” ujar Garbus makin membari maras.

Halaman
12
  • Ikuti kami di
    KOMENTAR

    BERITA TERKINI

    berita POPULER

    © 2023 TRIBUNnews.com Network,a subsidiary of KG Media.
    All Right Reserved