Si Palui: Nyaman Batilantang

KAJADIAN handak baagak manampaiakan sandal hanyar nang ditukarnya matan pasar tungging, sakalinya Tulamak malah pina pincat bajalan.

“Kanapa maka timpang bajalan Mak?” ujar Garbus sambil bagimit maitihi batis Tulamak.

“Ooo... aku paham kanapa maka batis ikam lingsak, karna sandal hanyar,” ujar Garbus.

“Hi’ih aku mamugai sandal hanyar Bus ai,” sahut Tulamak manampaiakan sandalnya.

“Pantas haja batis ikam lingsak karna sandal hanyar itu lain sabalah Mak?” ujar Garbus.

“Bujurkah Bus sandalku ini lain sabalah. Kalu lain sabalah tapaksa kaina kuhurupakan,” ujar Tulamak mananding kadua balah sandalnya.

“Aku ada susurungan hanyar Mak ai, napa yu bila batingharap pasti ngalih dan kada nyaman,” ujar Palui.

“Tatakunan itu pasti manyarempet-nyarempet, kaya samalam mamadahakan yang enak itu adalah sakilan di atas paha,” ujar Garbus.

“Kalu batingharap ngalih dan kada nyaman, maka bahiringpun ngalih dan kada nyaman jua?” ujar Palui.

“Kada lain jawabannya pasti nang samacam itu,” ujar Tulamak.

“Kukira pikiran bubuhan ikam haja nang katuju ka situ padahal tatakunanku ini bujur-bujur ada buktinya,” ujar Palui. “Amun batilatang nang nyaman mamasukannya, nyuurrr... Mahalunyur masuk.

Ayu tangguh, jawabannya kada lanji Mak ai,” ujar Palui.

“Kami mangalah, napa jawabannya Lui ?” ujar Garbus.

“Jawabannya adalah nang kita panderakan tadi, bila sandal tatilungkup ngalih mamasukakan batis, kaya itu jua bila tahiring. Bila sandal batilangtang maka nyuurrr... Batis masuk,” ujar Palui takurihing . (bp/tam)