Tindakan Tagas

BIAR imbah anu banyak kada tapi paham alias lambat kakaliannya rahat bapikir tagal banyak urang nang tahu amun Palui tu paakalan banar. Biar kada pawanian tagal inya bisa maakali supaya urang kada wani wan inya.

Kakawalannya nang sarantang-saruntung tumat halus, kaya Garbus, Tulamak wan Tuhirang tahu banar kalakuan Palui. Bubuhannya saurang sudah mambutiakan rahat Palui masih bujangan.

Waktu itu Palui kadada gawian tatap. Sahari-hari inya mambica aja. Mun sudah mambica tu artinya imbah anu harus wani. Amun kalah rahat digaratak urang sadikit aja harau timbul garatis aja maantarakan urang, alias kada wani managih.

Kisah kawanian Palui tu dibuktiakan kakawalannya rahat Palui mangayuh bica maliwati jambatan nang kipit banar. Mayu gasan bica aja liwat. Maka biar kipit liwar panjangnya jambatan ulin tu.

Rahat sudah di tangah jambatan, manggah mukuh sudah mangayuh, sakalinya Palui taparaung wan tantara babaris nang liwat jambatan tu jua.

Malihat bica Palui di tangah jambatan, kumandan tantara tu hancap bapara ka Palui. "Bapak... Sebaiknya bapak mundur, kami mau lewat," ujar kumandan tantara tu.

Mandangar disuruh mundur, takurisit dahi Palui. Dalam hatinya, sudah manggah mukuh mangayuh bica sampai ka tangah jambatan disuruh mundur, kada hakun Palui.

"Sabaiknya buhan pian nang mundur," ujar Palui manyahuti.

"Apa! Coba bapak bilang sekali lagi!" ujar kumandan tu. Banyaring suaranya mandangar Palui wani manyahuti.

"Sabaiknya buhan pian nang mundur. Kalu kada mau, aku pacang maambil tindakan tagas!" ujar Palui umpat banyaring jua.

Bubuhan warga bajukung nang maunjun undang di bawah wan parak jambatan tu cangangan samunyaan mandangar ada urang bakakancangan di jambatan. Tamasuk Garbus wan Tulamak. Buhannya mahitung cagar bakalahi jua Palui wan tantara tu.

Marasa kada nyaman dicangangi urang banyak, apalagi kalu pina habarnya malalain di kuran, tantara mamukuli tukang bica, bagamat ai tantara tu bakalah. "Pasukan....... mundur...'" ujar kumandan tantara tu.

Imbah buhan tantara tu mundur liwat ai Palui sambil manunjul bica ka ujung jambatan. Panjang kurihing, dada baangkat kaya urang jagau banar tu pang.

Rupanya panasaran jua kumandan tantara tu wan ucapan Palui rahat bakancangan di tangah jambatan tadi. "Apa yang bapak maksud dengan tindakan tegas saat di tengah jembatan tadi?," ujar kumandan tu manakuni Palui rahat sudah sampai di tabing.

"Kada papa ai ndan ai. Maksud ulun tindakan tagas tadi supaya kada tapi lawan aja kita di tangah jambatan. Kasian kalu urang lain nang handak liwat taganggu. Tindakan tagas nang handak ulun ambil tu, amun buhan pian bakaras kada mau mundur maka ulun nang bamundur. Parmisi, ulun dihadangi panumpang," ujar Palui sambil babuat lalu mangayuh bica.

Kumandan tantara tu tanganga-nganga mandangar ucapan Palui. Sangkannya tindakan tagas nang kaya apa kah. Sakalinya siap mundur jua. "Bah... Jaka tahu kukarasi tadi. Bahujung supan wan anak buah hari ini aku," ujar kumandan tantara tu sambil manapak ka dahi maraga digawi Palui. (rep/ofy)