Si Palui: Kada payu

PALUI bila takumpulan wan Garbus, Tulamak pasti bakalahan, pina kaya urang dua laki bini nang handak basarakan haja lagi.

“Duit dipagat kada payu Lui ai? Aku tuhuk kamana-mana maulanjakan kada mau payu,” Jar Tulamak . Duitku ini tapagat bakas basah.

‘Cuba pang bawa bapikir nang normal Mak,” jawab Garbus.

“Secara akal sehat, dasar bujur pang duit dipagat kada payu,” ujar Palui , “Tapi ikam kalu nang maulanjakan jadi kada payu Kalu aku barapa haja pasti payu baulanja di Pagat.”

“Nah, aku unjuk duitnya, kaina ikam ulanjakan? jar Tulamak pina sarik.

“Kita nah batiga tulakan ka Pagat Batu Benawa, duit di Pagat pasti payu,” jar Palui.

Tulak batiga buhannya ka Pagat, makanan di warung Acil Mariah

“Barapa, Cil kami makan batiga,” takun Palui ka acil warung.

“40 ribu haja Pa ai,” jar Acil itu jadi ma angsul sapuluh ribu.

‘Han Mak, Bus ai, payu kalu duit di Pagat…kurang duitnya haja lagi.” Sakalinya Palui manjumput duit nang kada bapagat , manjurung ka anu acil warung. Kada satahu buhannya.

Pas di rumah bini Palui batakun mana duitnya nang 50 ribu, di atas tv maka hilang.

“Aku hutang dahulu umanya ai, aku handak mangalahakan buhannya, waktu babayar makan di Pagat, kujurung duit 50 ribu itu te, jadi payu. Duit Tulamak nang bapagat kada payu nyata…kaina aku ganti umanya ai, nang panting kawa sakali ini mangalahakan buhannya badua. Biar haja rugi mantraktir,”

Mandangar itu marangut bini Palui. (aan)