2 x Sambat

RAMI takumpulan di gardu, Palui sapakawanan manunggu beduk magrib, buka puasa. Bacatur sudah muyak, main badumlah, main duminu, kada pantas di bulan puasa.

“Kita batatangguhan haja,” jar Palui, nama kampung dua kali sambat.“Cuntuhnya kampung apa Lui?” takun Garbus.

“Cubalah tangguh, di kampung itu gadisnya langkar-langkar, kampung apa?” Palui batakun.

“Kampung Alu-Aluh,” sahut Tulamak.

“Saratus Mak ai ikam. Lalu kampung apa lagi, urangnya suka babasah –basah mancari iwak?” takun Palui pulang.
“Kampung Buas-Buas di Margasari,” jar Garbus capat menyahuti.

“Saratus Bus ai ikam. Kamudian kampung apa urangnya suka mamancuk asam palipisan?”

“Kampung Asam-Asam di Tanah Laut,” lakas Tulamak manyahut.

Nah, ini tatangguhan rabutan, di kampung itu sungainya luas, sungainya dalam…

“Sungai Bahalang di Tapin Tengah sana,” jar Tulamak.

“Salah ikam,”

‘Sungai Raya di Kandangan.”

‘Salah jua buhan ikam. Nang bujur Sungai Kali di kecamatan Simpur, kabupaten HSS. Kali itu sama haja wan sungai. Kadada urang manyambat kampung sungai-sungai. Jadi disambat urang kampung Sungai Kali, kampungnya luas sungainya…

“Kalahan kami,” jar Garbus.

Taraktir aku buka puasa makan papuyu baubar, buhannya ai. Palui tatawa. (aan)