Si Palui: Maasah Dahi

BARAKIT-RAKITka hulu, barenang-renang ka tepian, barsakit-sakit dahulu, hanyar kamudian barsenang-senang, nitu ungkapan pribahasa atau lirik lagu Uma Irama parjuangan wan doa.

Damintu jua hidup manusia barsakit-sakit atau susah-susah dahulu, kena sudah tuha hanyar mamutik hasilnya. Sama haja bila handak jadi wali, maka basusah dahulu hanyar kamudian marasakan hasilnya.

”Napakah Palui ni pina takurinyum haja,” rawa Garbus.

“Aku rasa lucu Bus ai, urang nitu mangaku wali, tapi kalakuan kada sabanarnya kaya wali. Salat batarus haja. Artinya urang azan di masjid, inya batarus haja. Kada mau singgah di masjid, siang Jumahat urang ka masjid, inya maunjun, tapi mangaku wali? Kalau kita ni dasar urang awam ya. Jadi kada kawa bapadah hebat, atau bapadah salat di Makkah pada hari Jumahat, kada kawa kaya nitu,” Palui tauling kapala tapi sambil takurinyum.

“Zaman gila Lui ai, jadi kalakuan manusia taumpat gila jua, cuntuh nyata banyak urang minum-minuman keras oplosan, padahal banyak haja minuman sehat wan halal, tapi diminumnya nang haram. Akhirnya mampus karana minuman keras oplosan nitu jadi racun masuk ka dalam tubuh,” Garbus mambari cuntuh jua.

“Makanya Lui wan Garbus ai, kada nyaman-nyaman ujian handak jadi wali Allah, lagi halus atau lagi anum tuhuk maasah dahi, manggawi salat sunat sampai saratus rakaat atau sampai saribu rakaat tiap malam, hidup susah, suah makan atau rancak makan gangan gadang pisang dicampur uyah, manalaah kitab dalas babantal nyiur. Bila tagululur nyiurnya, tabangun, salajur haja sampai ka subuh, nitu kalakuan wali Allah te,” sahut Tulamak kada mau kalah.

“Uma aku asa titikan banyu mata mandangar kisah ikam Mak ai. Urang mangaku wali nitu, pariksa sikapnya, bila kana musibah inya sabar atau kada sabarkah. Urang mangakunya ahli ibadah, tapi mudahan salah pang dugaanku, gatah hambawang dikasai ka dahi, jadi pang ada tanda hirang di dahi bakas rajin sujud kisahnya, padahal guring mangaruh banar tiap malam, bapadah ahli ibadah supaya ditangguh urang wali inya nitu, tapi mudahan haja pang kadada di wadah kita naya, artinya bujur-bujur hirang bakas lawas sujud salat satiap malam,” sambat Palui.

“Macam-macamlah kalakuan manusia, kalau kadada nang maniniwah kada rami alam dunia ni,” ucap Garbus.

“Saurang biasa-biasa haja buhannya ai, nang panting kawajiban lima waktu jangan sampai ditinggalakan, nitu pang peganganku,” Tulamak merendah haja inya.

“Manusia nang baik nitu hubungan wan sasama manusia jua baik, hubungan dia wan Allah Ta’ala jua baik, nitu gin cukup haja sudah, kada mamander kasupanan urang lain, jaga diri wan kaluarga dari hal nang dilarang Allah, iya haja sudah, surga dunia buhannya ai,” Palui manambahiakan.

“Banyaki maasah dahi Lui ai, jadi dahi ikam hirang tanda banyak sujud, nyaman ikam dipadahakan urang wali, siapa tahu ya,” Tulamak manyaranakan sambil lihum.

Takarinyum Paluinya. ”Mudahan aku jadi wali Mak ai,” harap Palui.

“Aku minta barokah ikam Lui ai,” Garbus manyalami ka Palui. Iya haja sudah buhannya naya.
(aan maulana/penulis matan kuta dudul, HSS)