Si Palui: Hilang

DUNIA ini sarangnya bala, musibah wan bancana. Jado kada usah hiran bila di dunia ada turun bala, malapetaka wan kasangsaraan lainnya. Di sisi lain dunia nitu jua cantik, bungas langkar sampai ka buncu-buncu kampung. Siapa nang handak diseur dunia maka baparaklah kesenangan dunia saparti mutur mewah, rumah megah, makanan lezat, duit bakabat-kabat, amas bakilo-kilo, tanah atau pahumaan sing luasan, wanita cantik, pangaruh, jabatan, kadudukan wan kakuasaan.”Bila samua kasanangan dunia nitu hilang maka taungutlah ia!

Palui merenung tafakur di masjid usai salat Subuh. “Napa Lui mamikirakan langit kada batihang, kada kawa ikam, kada sampai lagi,” rawa Garbus.

“Makanya kesenangan dunia nitu jangan tarlalu banyak dicari, kena banyak jua maninggalakan kawajiban tarhadap Allah Taala, karana sibuk baurus harta haja,” ujar Tulamak baucap.

“Haur bausaha tarus siang malam, kada ingat lagi salat lima waktu,” lanjut Tulamak.

‘Sasadangnya haja iya kalu Mak?” sahut Garbus.

“Samua kasanangan dunia nitu akan sirna , akan binasa buhannya ai, bumi ni akan digulung Allah Taala jadi napa nang disumbungakan? Harta nang banyak kadada artinya lagi, bila di alam kubur kena manjadi banyak partanyaan malaikat, bila dicari dangan jalan nang kada halal, harta nitu jadi siksa kubur. Kada parcaya ayuha buhannya ai nang mangumpulakan harta di jalan kada halal nitu cuba akan mati badahulu bujurkah kadakah disiksa malaikat di kubur, sudah nitu hanyar kembali ka dunia, mambawa habar wan urang di dunia, kawalah buhannya?” Palui kritis.

“Masuk diakalkah parnyataannya tangguh haja Lui lah,” ujar Garbus mandukung parnyataan Palui.

Bila sudah hilang samua kasanangan dunia hanyar manyasal , jaka lagi dahulu basedekah, bazakat, inya ada dua pilihan, kita nang badahulu maninggalakan harta saparti mati, atau harta badahulu maninggalakan kita saparti kabakaran, kahilangan wan kamusibahan lainnya,” lanjut Garbus.

“Jakanya barataan maamalakan ajaran agama , maka hidup damai, tenang, cukup apa nang ada, masjid hibak tarus tiap salat lima waktu, mudahan kita manamui suasana nang kaya nitu di banua naya, asa nyaman jua pahinakan,” sahut Tulamak jua.

“Mudahan buhannya ai, apalagi sudah banyak cuntuh harta banyak, eh sakalinya ditangkap aparat negara, karana mandapatakannya dangan jalan korupsi, mudahan jangan taulang lagi nang kaya nitu, supan banar kita ya. Palui banyak baisi wawasan wayahni. (aan maulana/penulis matan kuta dudul,HSS)