Si Palui : Mahambit Atap

WAYAHNI Palui rami batukar daun rumbia matan desa Asam Pariok dibawa ka Hamawang Muka, ka rumahnya.

”Pina saing banar Lui lah ikam batukar daun rumbia, gasan apa?” rawa Garbus ka Palui.

“Aku batukar saurang nah, daun rumbia matan Asam Pariok sana, rancana te aku handak mahambit atap rumbia Bus ai?” sahut Palui kalihatan himung.

“Tahukah Lui, wayahni rata-rata ba atap seng, multiruf atau atap sirap bagi nang sugih, kadada lagi baatap rumbia,” Tulamak mahuwasani.

“Tenang haja ikam Bus ai, Mak ai, nang panting dicuba dahulu, aku malihat banyak haja rumah di hulu sungai naya masih baatap rumbia naya,” jawab Palui tagas.

Bulikan buhannya badua nang rajin muhawasani Palui handak bausaha. Kaya nitu pang baisi kawal, bahanu manyamani, bahanu manyakiti, sakit atau nyaman saurang jua nang manyandangnya.

Tasusun rapi atap rumbia di muka rumah Palui, karana satatusnya barang dagangan jadi ada haja nang manakuni Palui. ”Atap rumbia naya dijualkah Lui?” takun Haji Usman nang banyak baisi kurungan ayam.

“Ulun jual pak haji ai, Rp 2.500 sabidangnya,” jawab Palui.

“Wan antarnyakah Lui?” takun sidin.

“Ini hanyar di rumah ulun haja pak haji ai!” sahut Palui.

‘Aku tukar saratus bidang , jadi bila kada cukup, aku manukar lagi ka ikam Lui ai,” ujar sidin sarius sambil baakad ditukar, dijual. Bakukut duit Palui, bajual kuntan atap rumbia.

Kisukan harinya Palui manukar pulang atap rumbia ka Asam Pariok gasan dihambit kalu-kalu ada nang handak manukar. Pendek kesah, Palui tuntung mahambit saratus bidang nang kadua kalinya.

“Ui Lui aku handak manukar atap nah?” takun Findra sapupu Garbus.

“Iyakah, barapa bidang?” takun Palui.

“Saratus bidang, barapa sabidangnya?” sambat Findra.