Si Palui: Dalas Bakisut

KALAU tentara wani basumpah dalas hangit NKRI harga mati, tapi kalau Palui dalas bajalan bakisut tatap ka masjid salat bajamaah. Kada ham Palui naya, indah kalah wan aruah abahnya bahari, rajin salat bajamaah ka masjid sampai sidin maninggal dunia.

”Aku tarus tarang haja Bus ai, tampulu awak sehat aku handak maamalakan 40 hari salat bajamaah tarus,” ujar Palui ka Garbus.

“Basa-basi haja ikam Lui ai, basalang nang ada ni gin ikam kada rajin ka masjid, banyak di rumah haja,” sahut Garbus mampahawai.

‘Tapi biarlah nang sudah barlalu,” jawab Palui inting haja.

Palui lakas maninggalakan Garbus nang mampawahai inya. Sampai di rumah Palui curhat ka bini, maklum ni masalah pribadi laki, jaka masalah kalangkaan gas elpigi talu kiluram nitu curhatnya ka warung curhat Babinkamtibmas.

” Napa te abahnya ada masalah apa pian mahancap datang ka rumah?” takun bini Palui asa bingung jua malihat.

‘Aku dipahawai Garbus, tapi kada jadi masalah umanya ai, aku handak mulai Maghrib ni satarusnya salat bajamaah ka masjid sampai 40 hari,” ucap Palui pina musti.

“Tasarah pian haja abahnya ai, ulun di rumah haja salat lima waktu nitu,” sahut nang bini.

Balum Maghrib Palui sudah datang ka masjid, pukuknya kupiah Madinah wan baju koko hanyar rancak dipakainya. Kada babulikan lagi Palui datang di masjid sampai waktu Isya. Imbah bulik pada masjid nitu asa suka Palui mandapati bini.

”Uh umanya dua waktu sudah aku kawa salat bajamaah,” Palui himung bapadah ka bini.

“Tapi abahnyalah hati-hati subuh ni kalu malandau, habis am di ulang pulang?” ingat nang bini.

Karana hidup manusia nitu bagarak, maka ada parkambangan dari hari ka hari, entah kanapakah Palui khilaf waktu basapida mutur handak ka sakulahan tagalincir di jambatan ulin, napa ada sakit banar ibu jari batis parak kada kawa bajalan katindihan sapida muturnya nang rabah nitu.

”Umai nah sakit banar ibu jari batisku umanya ai, katindihan sapida mutur nang rabah, akibat taglincir tarumpak jambatan nang baampar papan ulin,” Palui mangaluh banar sakit batis, jadi bakisut bajalan, maski kawa haja maunggang sapida mutur.

“Kawalah abahnya ka masjid pian?” takun nang bini prihatin.

“Kawa ai umanya nah aku bagamat,” sambat Palui sambil maringis kasakitan.