Si Palui: Akar Kuat

URANG barumahtangga dua laki bini pasti mangharapakan kabahagiaan lahir wan batin. Kalau sabalah alias bahagia lahir haja sudah pasti timpang , makanya jangan hiran wan takajut ada binian nang basalingkuh.

”Ada kisah Lui ai, urang dua laki bini , nang laki mancari tatamba supaya kuat lahir batin, akhirnya lumpuh,” ujar Garbus manyurung kisah.

Pina takijat Palui, kada manyangka akibat tatamba kuat nitu bisa jadi lumpuh. ”Inya napa Bus?” sahut Palui.

“Karana nafsu kada saimbang wan keadaan awak, bini dua ikung,” Garbus lihum.

“Tarusakan ha kisahnya, handak tahu aku nah wan buhan masyarakat berataan,” Palui minta lanjutakan kisahnya.

“Urang bini dua, nang laki kurus haja, karana babini dua nitu maka handak mancari tatamba supaya bini kadua-duanya puas, lahir wan batin, iya kada?” Garbus lanjut bakisah.

“Iya banar Bus ai?” Palui maiyakan.

“Jadi mancari tatamba kampungan haja, datang ka wadah tabib, nang bisa batatamba supaya kuat nih, akhirnya diberi tabib akar kuat, disuruh dirandam ka banyu kemudian banyunya diminum maka akan kuaaatt, “ ujar Garbus banahap.

“Sudah nitu pang, apa dasar kuatlah Bus?” Palui panasaran.

“Tabukti dasar kuat Lui ai, kawa mamuasakan bini dua ikung, datang nang laki ka tabib nitu pula handak bapadah bahwa inya dasar kuat, tapi napa nah?” Garbus minta tangguh.

“Bujurlah dasar kuat inya nitu?” sahut Palui pina ragu pula.

“Bujur kuat Lui ai, tapi bajalan rait, lintuhut karing cupu, jadi bajalan pina timpang, bahanu manjapai ka lintuhut,” Garbus tatawa.

“Han jarku lah kaya naya?” Palui tatawa jua.

“Datang ka tabib balapur, lintuhut sakit, jadi handak minta kurangi dosisnya, supaya sama-sama baik, lintuhut kada sakit wan tatap kuat, nang laki bapadah ka tabib,” ucap Garbus.

“Napa jar tabib panambaan nitu Bus?” Palui baucap.