Kampung Kadap

MANYIKAPI parkambangan wayahni maka di kampung Palui diadakan runda malam kaya di kampung lainnya.

”Ikam Lui lah, tiap malam Ahad haja jaga runda, kubari waktu malam peray karana ikam pang jadi guru di sakulahan,” tawar ketua RT kapada Palui.

‘Akur Pak RT,” sahut Palui mantap.

Jadi pamanderan Palui sapakawalan, wayahni banyak kajadian nang kada disangka, misal ada nang kahilangan sapida mutur di dalam rumah, padahal sudah dikunci bahu sapida muturnya.

”Makanya kita diwajibakan Pak RT Bus lah, bajaga malam di kampung,” ujar Palui ka Garbus.

“Kita apa jar pimpinan haja, akur banar,” sahut Tulamak.

“Apa jar komandan,” ucap Garbus.

Pas jaga malam Ahad nitu, ada katua RT nang turun, umpat jaga runda ka gardu.

”Parasaku Pak RT lah, di kampung kita naya makin bakadap haja,” ujar Palui ka Pak RT.

“Ikam kaya apa panjanak Lui, padahal kita sudah lawas balistrik masuk ka kampung kita naya,” tumpalak katua RT.

“Apa Lui mata ikam rabunkah sudah? Cuba lihati di langgar, di masjid, banyalaan tarus listriknya, di rumah-rumah panduduk banyalaan jua listrik, tarang pang parasaku nah di kampung kita ni,” jawab Tulamak.

‘Macam-macam haja ikam Lui lah, listrik nang tarang dipadahakan kadap, kaya apa ya?” Garbus jua bingung.

“Ayuha bujur jar buhan ikam berataan, jar pak RT bujur banar jua, tapi sabuting nang parasaku makin kadap, karana kita ada bahari baisian dua ikung tuan guru wayahni kaduanya maninggal dunia, makanya jarku kampung kita ni makin bakadap, karana tuan guru nitu ibarat bola listrik tarang jadinya kampung, ada balajaran mangaji tiap imbah Maghrib sampai ka Isya waktu ada sidin-sidin nitu, balajaran fikih, tauhid. Wayahni kadada lagi di kampung kita naya, iya kalu makanya kusambat di kampung kita ni makin kadap,” ujar Palui.

“Uh bujur banar Lui ai, kadap dalam arti lain maksud ikam nitu, dahulu rami waktu dua tuan guru nitu masih hidup, balajar agama, bamaling kadada, wayahni kadap di kampung kita, nang balajar mangaji kadada lagi. Tuan guru babacaan kadada lagi, jadi asa mangadap kampung kita naya. Ruhani kita kadada lagi diisi wan tausiah agama,“ sambat pak RT sarius.

“Makanya anakku kusalahakan ka pasantren, supaya kena bulik ka kampung kawa malajari kakanakan di kampung kita ni?” sahut Palui lihum.