Si Palui: Bajual Harang

KALAU dahulu urang tuha mamadahi banar, bila bakawan jar sidin wan tukang minyak harum haja, supaya tapalit minyak harum awak. Tapi jar sidin jangan baparak wan urang bajual harang kena tapalit jua awak jadi hirang, nitu paribahasa haja pang buhannyalah.

Nang bujur nitu bekawan wan urang nang alim, sabaliknya jangan bekawan wan urang jahat (perampok, maling) kena taumpat didakwa urang jadi maling padahal kada umpatan inya.

”Urang tuha bahari mahatiakan banar wan pargaulan anak, bila kada bulik jam sambilan malam, lakas kuitan mancari ka sana ka mari, ka wadah kawannya nang suka pahuhurun malam,” ujar Palui ka Garbus.

“Apalagi anak binian bila sampai sanja kada bulik, baasanan banar urang tuha di rumah, iya kada Lui?” sambat Garbus.

“Bujur Bus ai,” sahut Palui.

“Kalau wayahni pang kaya apa pargaulan kakanakan khususnya anak remaja?” takun Tulamak.

“Zaman berubah banar sudah Mak ai, bila anak di rumah haja, disambati urang jua, kada payu lagi balaki. Tapi, mun inya bajalan wan lakian, disambat urang anak biniannya nitu payu, himung nang mamanya,” Palui bisa bakisah.

“Makanya kawin anum wayahni banyak banar, karana mamanya himung anak payu balaki wan kada bujang tuha, iyakah Lui?” sahut Garbus.

“Iya banar Bus ai,” ucap Palui lihum.

Kamariannya Palui duduk saurangan di gardu, ada datang pak RT mangawani. ”Napa Lui ikam pikirakan pina sarius banar?” rawa katua RT .

“nang ngaran nasib manusia pak RT lah, kada kawa ditebak atau ditangguh. Dahulu sugih wayahni jatuh miskin, banyak haja nang kaya nitu. Tapi ada jua nang bahari miskin wayahni sugih, nitu mudah haja bagi Allah Taala apabila sidin manghandaki kaya nitu wan manusia,” Palui mambari parnyataan.

“Adakah cuntuhnya Lui?’ takun pak RT.

‘Sabuting haja ulun mancuntuhakan pak RT lah, sidin bahari susah gawian bajual harang, eh sakalinya wayahni sugih kawa naik haji sudah, wan tulak umrah nang hanyar ni batiga baranak, inya napa nah pak RT,” Palui minta tangguh .

“Inya nasib sidin Lui ai, jadi urang sugih, apakah amalan sidin nitu, parlu kita takuni,” ujar pak RT.

“Harang wayahni laku keras pak RT ai, apalagi harang nang kualitasnya nomor wahid , saparti harang matan kayu halaban , diparluakan urang banar, gasan mamanggang iwak di rumah-rumah makan tarkenal di kuta ganal, makanya sidin dalam saminggu hakun dua atau talu trak mangirim harang nang barkualitas nitu,” kisah Palui besemangat.