Si Palui: Aruh Manusia

PAHABISANNYA bekawinan ading binian Palui nang bengaran Ading Ilan. Jadi, jangan hiran mama Palui wan Paluinya jua ai saing besaruan baik kaluarga nang ada di hulu sungai maupun nang ada di Banjarmasin.

”Pukuknya kita aruh ganal Lui ai, ading ikam nang paampihan ni,” sambat mama Palui.

“Ulun tasarah pian haja Ma ai? Maklum sabagai anak harus bakti wan urang tuha,” sahut Palui mantap.

Sabalum acara bekawinan diadakan acara bahadring di rumah urang tuha Palui, takumpulan Palui sapakawalan ditambah kaluarga wan urang di kampung.

”Siapa nah nang jadi seksi surung sintak?” ujar Palui manimbai parnyataan.

“Kalau nitu Tulamak haja,” sahut katua RT.

‘Siapa seksi parkir?” ujar Palui pulang.

“Garbus seksi parkir,” sahut Tuhirang.

Hari Ahad pukul 7 sudah banyak urang datangan saruan ka wadah Palui, baik masyarakat biasa maupun tukuh masyarakat, rami saruanan.

”Nasi habis Lui, lontong jua habis?” ujar Tulamak balapur.

“Iyakah? Kita mahadang dahulu nasi balum masak lagi,” ujar Palui tegang pas pukul 10 rahatan urang sing banyakan.

“Urangnya banyak banar lagi nang datangan,” lapur Garbus ka mama Palui.

“Ini tadi sudah bamasak, tapi baluman masak lagi Bus ai?” sahut mama Palui pucat.

Dihadang-hadang satangah jam, sampai sajam balum masak jua nasi wan lontong, bulikan urang saruan maski balum makanan.

”Tarimakasih Lui ai nah, maski kami parut lapar kada jadi masalah?” ujar urang saruan dangan muka cemberut.

“Tarimakasih minta maaf kami pak ai, bu ai, ada kesalahan teknis nah?’ Palui pucat jua muha.