Daftar Tunggu

URANG rami ka majlis zikir wayahni, tapi kanapakah Palui masih kada hakun lagi masuk ka majlis zikir nitu.

”Ikam Lui sudah masuk ka majlis zikir di masjid A, tiap malam Arba ya?” takun katua RT nang rancak sapamanderan wan Palui di gardu.

“Kalau aku ada mandangar Lui ai, ikam kada kawa lagi umpat bazikiran di masjid A nitu karana urangnya sudah anam ribuan,” sahut Garbus.

“Kawa atau kada datangi Lui ai, ikam wan Garbus ka masjid A nitu?” suruh katua RT.

Palui wan Garbus basapida mutur mandatangi panitia majlis zikir di masjid A, langsung betakun ka panitianya. ”Ulun Pak Haji ai, handaak jadi angguta majlis zikir kawalah?” takun Palui.

“Minta maaf Lui lah, ikam bila handak jua tamasuk daftar tunggu haja hakunlah?” ujar panitia nang bangaran H Tarjimin.

“Iyakah Pak Haji, jadi kada kawa umpat tiapa malam Arba nitu?” Palui kada paham.

“Tadi kusambat kada kawa lagi dahulu, kacuali ikam hakun masuk daftar tunggu ya?” sambat sidin sakali lagi.

“Kaya ni haja Lui ai ikam umpat haja tiap malam Arba bazikiran tapi pang kada tercatat lagi sabagai angguta majlis zikir, iyakah Pak Haji?” Garbus malurusakan.

“Betul, betul Bus ai,” jawab sidin.

“Jadi kaya apa ulun turun hajakah ka majlis zikir tiap malam Arba kena?” takun Palui maanyaki banar.

“Bulih banar turun tapi balum dapat kartu angguta majlis zikir, kena bila ada nang maninggal dunia, ikam kumasukakan sabagai angguta hanyar majlis zikir,” sahut sidin.

”Maka nitu nang dicari urang banar wayahni, karana bila maninggal dunia dibari santunan dua juta, kain kafan peray jua, imbah nitu manyalatakan janazah buhan angguta majlis zikir, gratis kada usah diamploki buhannya nitu. Makanya rugi bila kada masuk majlis zikir wayahni, meringanakan banar wan urang nang maninggal dunia wan kaluarga nang ditinggalakan, dihadiahi 70 ribu zikir gasan nang maninggal dunia,” Garbus manambahakan. Bagaru kapala Paluinya, nap ate maka kada umpat matan dahulu.

“Nasib-nasib daftar tunggu haja, bulan Februari tadi daftar tunggu jua, 27 tahun hanyar tatulak ka Makkah, ni mandaftar majlis zikir maka daftar tunggu jua, kaya apa naya?” Palui gagarunum.

“Nitu pang Lui ai, jaka anam bulan atau tujuh bulan lalu, masih baterimaan angguta majlis zikir,” sahut Haji Tarjimin.