Si Palui: Kahilangan Duit

NGARAN musibah, bancana, berita duka, nitu andaknya di dunia, kena kalau sudah bamukim di surga kadada lagi nang ngarannya duka, samuaan kabar gembira, panuh suka wan kasanangan. Maski jadi kapala sakulah (kepsek) panampilan basisingut wan bajanggut bukan jaminan kada dibuntuti maling habis maambil duit di bank.

”Napa Lui pina galu banar di sakulahan ikam samalam te?” takun Tulamak urang tuha murid ka Palui.

“Kepsek Mak ai, kahilangan duit waktu sidin salat Dzuhur di masjid,” ujar Palui.

“Dimana sidin maandak duit?” takun Tulamak lagi.

“Pak kepsek maandak duit di box sapida mutur sidin, kebetulan kunci sapida mutur kada becabutan, urangnya salat, pas iya haja sudah,” Palui mambawa habar angkuh maniwas wan kepsek.

“Barapa duit sidin habis dibawa maling?” Tulamakhandak tahu.

“Ujar sidin 15 juta, duit sakulahan 10 juta, wan duit sidin pribadi 5 juta, habis lenyap tanpa kesan, kaya apakah ni, mudahan haja pang gajihan kaya biasa buhan guru hunur?” Palui baharap banar mudahan gajihan saparti biasa bulan April ni.

Jadi pamanderan masyarakat , kepsek kahilangan duit di parkiran masjid pada waktu salat Dzuhur bajamaah. Maklum banyak manusia jadi kita kada tahu, bujurkah urang nitu salat di masjid atau handak maunting sasuatukah niatnya salat ka masjid, kita kada tahu. Kada kawa mamvonis sasaurang biar inya baju koko, siapa tahu baniat jahat handak ka masjid. Tapi biar inya baju kaos haja ka masjid, siapa tahu inya ahli ibadah wan alim. Parlu security di masjid-masjid nang jadi panyinggahan urang banyak, ayuha security badudi salat bajamaah, tapi ditugasakan manjaga keamanan masjid gasan kanyamanan samua jamaahnya, iya kada wan parlu jua urang wayahni CCTV di area masjid.

Di sakulahan Palui manakunakan kapada kepsek, apakah isuk buhannya gajihan.

”Isuk buhan guru hunur gajihankah pak?” takun Palui.

“Kaya apa Lui duitnya hilang. Aku mana kahilangan duit sudah, bini garing nang parlu ungkus gasan baubat, buhan ikam manukanakan gajihan kada pas Lui ai!” sidin sangit. Kaluar Palui di ruang kerja kepsek dimamai sidin..

Tapi nang ngaran gajihan nitu parlu bagi guru hunur akhirnya bendahara sakulah, kawa haja manalangi duit lain dahulu asal Palui wan guru hunur lainnya gajihan.

”Tarimakasih banar pak bendahara lah, kami gajihan jua bulan ni,” ujar Palui sambil umpat manyumbang maringanakan beban sakulah nang kahilangan duit.

Sampai di rumah Palui bagaru kapala, gajihan sadikitannya, inya manyumbang gasan manutupi duit sakulah nang hilang maski kada banyak, sabagai bukti Palui perduli wan sakulahan nang dalam keadaan barduka nitu.

”Aku umanya ai umpat manyumbang jua gasan sakulah nang kahilangan duit karana kepseknya lalai maandak duit,” ujar Palui ka bininya.

“Bah iya pang , cukuplah gasan bayar cicilan sapida mutur wan rumah?” takun nang bini ketus.

“Kada cukup umanya ai, aku pusing wan pusang nah!’ Palui mangaluh sakalinya.

Banyaki besabar Lui ai, supaya jangan stress. (aan maulana/penulis matan kuta dudul,HSS)