Si Palui: Disayang Laki

HIDUP berumahtangga ni parlu jua trik-triknya supaya bila ada masalah jangan maambil jalan pintas balajur sarak ha dua laki bini. Jangan banarlah kaya nitu, karana bagarak tihang arasy bila urang dua laki bini nitu basarakan. Hukumnya adalah makruh sesuatu nang bulih tapi sangat dibenci Allah Ta’ala.

”Kaya apa ikam Lui, sudah puluhan tahun berumahtangga tapi ikam saparanakan harmonis,” ujar Garbus mamuji.

“Memang ada haja pang riak-riak halus dalam rumahtanggaku, tapi ya itulah sabagai bumbu supaya rami Bus ai, mun tatawa tarus di rumah dipadahakan gila jar urang,” Palui indah dipuji.

“Tapi dasar bujur Lui ai, satahuku ikam kada biasa bahualan dua laki bini, alias rukun damai selalu,” sahut Tulamak jua.

“Iya begitulah Mak, pas haratan kadada baduit , sama-sama susah, haratan nyaman sama-sama senang, jangan handak senang sorangan haja, wayah sakit baadu ka bini,” ujar Palui manambahkan.

“Mungkin bini ikam nitu Lui lah, cukup pandidikan waktu lagi bujang ulih urang tuhanya, iya kada?” takun Garbus.

“Nah nitu nang panting ada pandidikan urang tuhanya waktu lagi halus sampai inya manginjak masa gadis remaja, jadi tahu lika-liku hidup berumahtangga nang bujur kaya apa,” jawab Palui.

“Kada kaya aku rancak bamamai haja muntung bini,” sahut Tulamak.

“Sama Mak ai, kami rancak bakalahian, basarakan haja lagi kada?” ujar Garbus maringis.

“Sabar buhannya ai?” sambat Palui.

Sakalinya betamuan bini Garbus wan bini Palui di arisan tiap kamarian Sanayan di kampungnya jua ai, rami imbah nitu bapanderan.

”Napa resepnya bini Palui jadi ikam harmonis berumahtangga?” takun bini Garbus.

“Resepnya susah-susah gampang bini Garbus ai,” sahut bini Palui.

“Iya padahakan ha bini Palui ai?” bujuk bini Garbus.

“Apa kahandak laki tu dicariakan wan ditulusakan, biarpun kita lagi uyuh awak,” sahut bini Palui.