Ujian Cinta

KADA hanya buhan palajar nang diuji supaya lulus sakulah, tapi urang dua laki bini atau urang barumah tangga diuji jua, lulus atau kadakah dalam mangarungi bahtera rumah tangga, ngarannya ujian cinta. Kaya apa kisahnya jadi ada jua ujian cinta Lui?

Babarapa hari lalu Palui ditelepon ulih sapupunya di Banjarmasin bahwa inya kematian laki. Lakas haja Palui wan bini mandapati kaluarga sapupu nitu gasan mahibur inya nang sedang barduka.

Kada pikir panjang lagi segera tulak basapida mutur matan hulu sungai ka Banjarmasin situ, imbah sampai di rumah duka banyak sudah urang datangan turut barduka cita.

”Alhamdulillah ikam lakas sampai Lui ai ka rumahku, kaya apakah nah, anak halus-halus lagi talu ikungan, abahnya maninggal dunia kaya apakah naya?” Rusda sapupu Palui manangis lelehan banyu matanya dihadapan Palui wan urang lainnya.

“Sabar Rusda ai, besabarlah.Rajaki kada di tangan laki pang, tapi kuasa Allah Taala, bapegang wan Allah Taala haja ikam, jangan bapegang ka laki atau urang lain, ingatakan banar nah pasanku ni,” ucap Palui sarius.

“Sedang sudah ikam manangis Rusda ai,” bini Palui mambisai kapada Rsuda jua.

“Inggih bini Palui ai, mudahan aku sabar, karana marasa takajut abahnya kakanakan maninggal dunia kada garing-garing, rasa hanyut jarnya kada lawas salajur kada bahinak lagi,” kisah Rusda sesenggukan.
“Sarahkan samuaan kapada Allah,” bujuk Palui, asa kawa lihum Rusdanya.

“Mudahan ada hikmahnya. Ini ujian cinta nang cukup berat, ujian berumah tangga nang cukup sulit,” ucap dangsanak Rusda nang sadih jua kematian iparnya.

Kaisukan harinya Palui bapanderan sapakawalan di gardu parak rumahnya.

”Datang dimana Lui semalam kada an di rumah?” takun Garbus.

“Akukah kematian laki sapupuku di Banjar situ, jadi lakas haja dua laki bini mandapatinya, mahibur, manasihati wan turut belasungkawa,” sahut Palui.

“Mantap Lui ai, ikam manjaga silaturahmi wan kaluarga di Banjar, biarpun jauh kada jadi sual, bapahala banar Lui ai,” timpal Garbus.

“Tapi kaya apa inya kematian laki apakah manangis manggarung?” takun Tulamak.

“Manangis ada ai pang, tapi kada manangis manggarung atau kuriak papar inya, wajar haja manangis Mak ai,” sambat Palui.

“Inya napa Mak betakun manangis atau kada manangis nitu?” Garbus handak tahu.