Si Palui: Ramalan Cuaca

“KALU manurut ramalan BMKG di wilayah kita ini sakarang baputinsi rancak tarjadinya ‘angin puting baliung,”, jar Palui mahabarakan wan buhan Garbus, Tulamak, Tuhalus sarta Tuhirang.

“Nang ikam sambat Bi-Im-Ka-Gi tu, Lui, urang mana ..?! Kalu didangar ngaran, sapartinya kada urang kita Banjar kalu, Lui-lah ..!!?” ujar Tulamak marika-rika.

“Nitu lain ngaran urang, Mak-ai. BMKG tu singkatan atawa parnuman dari‘Badan Mitiriulugi dan Klimatulugi Giufisika’, nang gawiannya maramalakan kadaan cuaca,” jar Palui manjalasakan.

“I..ii, damhatiku ngaran urang“, ujar Tulamak pina kasisipuan.

“Baarti ‘Bi-Im-Ka-Gi’ nitu diparluakan banar wayah cuaca pina kada karuan tampuh sakarang ini,” sala Garbus.

“Inya kada sakadaar maulah prakiraan cuaca haja, Bus-ai. Tapi buhannya jua mambari paringatan kapada masyarakat kalu ada gunung malatus, mintu jua kalu tarjadi gampa bumi, atawa jua manganai kamungkinan tarjadinya tsunami atau kada,” Ujar Palui panjang libar.

“Tapi amun di wadah kita ini atawa pulau Kalimantan pada umumnya asa jarang pang tarjadi gampa. Lain halnya awan di Jawa atawa di Sumatra sana, di situ mimang banyak baisian gunung barapi nang amunnya batuk bisa maulah gampa,” ujar Tuhirang pina lancar pandir.

“Mimang di wadah kita bulih dikata kadada gunung barapinya, tapi gampa itu bisa jua tarjadi lantaran limpingan di parut bumi ini bagarak atawa bagisir, Tuhirang-ai,” jar Palui pulang.

“Di wadah kita ini amunnya ada jua gampa, paling-paling ‘gampa lukal’ nang tarjadi di higa rumah Tulamak wayah malam Jumahat,” ujar Tuhalus mahaluya mahuluti Tulamak. Buhannya tadaraw tatawaan,Tulamak tapaksa misam-misam haja ditawaakan buhannya.

“Kalu di higa rumah Tuhalus mimang kadada gampa, sualnya disamping awak Tuhalus ringan, jua uli lintuhutnya sudah mulai karing,” jar Garbus malawanakan Tulamak.

“Iya.., bujur banar, Bus-ai ..!” ujar Tulamak kahimungan ada nang mambalasakan.

“Ngumung-ngumung sual ramalan cuaca ini, ujar Palui pina sarius, “suah tarjadi di dairah padalaman sana, nang waktu itu masih baluman ada listriknya, sahingga kalu malam buhannya tapaksa balampu minyak damar haja. Piturut nang ampun kisah, di situ ada saurang ‘Tutuha Kampung’ nang harat dan disagani banar ulih urang-urang.”

Masih ujar Palaui, “Sidin bajanggut putih labat, sisingut jua putih mamanting. Tangan sidin kiwa-kanan balilit galang bahar. Mata utas sidin ganal-ganal Parsisnya mungkin kaya bigi tiwadak kalu. Istimiwanya sidin ini, baliau tarkanal kawa maramalakan cuaca. Pukuknya urang-urang tabila handak maadaakan acara nang cagar mangumpulakan urang banyak, saparti bapangantinankah, atawa syukuran kalahiran anak-kah, atawa handak malakuakan parjalanan ka kuta bajalan batis bahari-hari, maka masyarakat di situ sabalumnya salalu datang awan tutuha kampung nitu batakun parihal kadaan cuaca. Sidinnya balalu maambil tumbak, kamudian dirajak-rajakakan sidin ka tanah sambil mata bapajam, samantara muntung sidin pina kumat-kamit mudil mambaca mantra. Imbah hitu hanyar sidin mamadahakan parihal kaadaan cuaca.”

“Baarti amun sidin rahat marajak-rajakakan tumbak sambil bapajam, kita jangan talalu rupak, luku tarajak taka batis kita,” ujar Tuhirang manyala kisah Palui.

“Nitu kada usah dibahas lagi, Tuhirang-ai. Cuba didangari dahulu kisahnya Palui nang lagi sarius inih ..!” jar Tulamak manumpalak Tuhirang.
"Hibatnya, lanjut Palui Pulang, bila jar sidin isuk akan tarjadi hujan labat. Maka isuknya dasar bujur tarjadi hujan sing labatan. Bila jar sidin, hati-hati.. dalam babarapa hari di hadap ada angin puyuh, tabukti jua !! Nah..,Karna rancak tabukti itulah, maka urang-urang pun mamitusakan awan sidin. Satu timpu ada urang datang batakun parihal cuaca awan sidin, tapi tumbin dijawab ulih sidi, untuk hari ini aku kada kawa maramalakan cuaca dahulu!”