Si Palui: Kana Skiming

WAYAHNI pambayaran gajih hunur atau guru negeri kadada lagi setangan lewat bendahara, tapi malalui pambayaran nun tunai, via bank jar urang pamarintahan.

Tuhuk Palui mahadangi tanggal satu karana tanggal nitu tanggal gajihan. Kabalajuran tanggal satu jatuh hari Ahad, maka sudah tanggal 31 bulan barajalan naya, iya haja.

”Balum gajihan umanya ai nah, hari ni Ahad, tanggal satu almanak habang,” Palui bapander ka bini.

‘Gajihan atau kada gajihan pian bahanu kada mambari jua ka ulun, iya kada mangaku haja?’ sinis nang bini.

“Ya maklum masih pangkat randah ni, haur babayar tunggakan kredit haja, aku gin manukar baju ngalih, haur babaju sasirangan kuning haja nah?” Palui sarik ka bini.

“Makinnya ai ulun haur babaju utak hundang ni ja bila turun ka arisan Sanayan kamarian, bahanu rasa supan wan ibu-ibu lain nang rajin ganti baganti tiap ka arisan,” bini Palui ketus ka lakinya.

“Iya haja sudah, arisan ni pamer baju hanyar atau pamer pakaian amas intan, kasihan nang kada panduitan lakinya kaya aku naya?” Palui marista.

“Karana Palui sibuk tugas di sakulahan pukul ampat hanyar bulikan, jadi kadada waktu maambil duit gajihan di bank, padahal ada sudah baisian kartu ATM. Palui kada wani manggunakan kartu nitu. Pas hari Jumahat habis salat Jumahat nitu Palui mancuba maambil gajihan via teller bank, digesek teller kartu ATM, barapa lagi saldo tabungan Palui kalihatan di situ.

”nah Lui ikam handak maambil duitkah, barapa?” takun teller bank nang langkar nitu.

‘Sasuai gajihanku bulan ni 2,5 juta,” ujar Palui mantap.

Digesek ulih teller nitu, tapi inya pina takajut, ujarnya saldo ikam Lui ai tatinggal dua ratus ribu haja lagi.

“Bujurankah ibu teller, maka gajihan sudah buhan kawan-kawan tanggal dua April tadi nah?” Palui bingung wan pucat.

“Maaf Lui lah, aku kada kawa malayani ikam dulu maambil duit, ni ada nang maambil lewat kartu ATM,” sahut teller manjalasakan.

Bulik ka rumah galu banar Palui bahwa kartu ATM nya kana skiming jua kaya urang di Pulau Jawa sana.

”Uh umanya kartu ATM ku kana skiming, jadi harusnya talu jutalabih, tatinggal dua ratus ribu haja lagi,” Palui baadu-adu ka bini.