Si Palui: Mambuang Perangai

UJAR urang bahari ada bujurnya jua, kalakuan manusia 40 hari sabalum maninggal dunia banyak malalain pada biasanya. Nitu ngarannya mambuang perangai parcaya kada parcaya bisa dibuktiakan kisahnya.

Bini Palui kamarian Ahad nitu batutukar pisang, nyiur baparut, gulapung wan lainnya di pasar betamuan wan kawannya lagi bahari sekelas di SD.

”Uh abahnya, Innalillahi… kawan ulun Hamnah maninggal dunia, padahal sabulan lalu kami betamuan sigar diwaras inya, wan minta barelaan banar kalu ada salah ucap, atau nang mambuat kada nyaman di hati ulun,” ujar bini Palui mambawa habar.

“Nitu pada waktu betamuan, kawan ikam Hamnah mambuang perangai umanya ai. Makanya barelaan banar kada biasanya kalu,” sahut Palui prihatin kamatian kawan bininya.

“Berarti kita nang cagar mati ni sudah tahu jua iyakah?” sahut nang bini.

“Belum tentu jua pang, banyak ai nang kada tahu cagar mati isuk, banyak banar kaya nitu manusia, tapi kalau urang nang diberi alamat cagar mati inya mulai bararasa sorang, makanya barelaan banar kawan ikam nitu saat betamuan di pasar sabulan nang lalu, karana inya marasa cagar kada badapat lagi wan ikam,” ucap Palui sarius.

Dalam sahari ni Palui pasti betamuan wan kakawalannya, baik di masjid, di gardu atau di pangkalan ujek tadapat haja.

”Barelaan banar Lui ai, aku babarapa hari ni kurang sehat awak,” ujar Garbus ka Palui.

“Inya napa maka garing Bus?” takun Palui.

“Maklum manusia Lui ai, kadanya sehat baumuran pang?” timpal Tulamak.

“Bujurlah Bus, ngaran hidup bahanu garing, bahanu sehat wajar nitu, tapi nang kumaksud, napa maka ikam pina barelaan banar ka aku agin mambuang perangai,” Palui lihum.

“Ya kita lihat sampai 40 hari kaya apa, masihkah aku hidup atau matikah aku dalam waktu 40 hari naya,” Garbus manantang.

“Sudah bararasa artinya ikam Busai,” sahut Palui.

“ya kita buktiakan ai, sampai 40 hari kemudian,” ucap Tulamak.

Pendek kisah sampai 40 hari nitu, Garbus sakalinya sehat wal afiat banar.