Si Palui: Adu Dumba

BANYAK manusia jadi banyak jua tingkah polahnya, macam-macamlah, ada peramah, ada pamarah, ada nang santun, ada pula nang panyarikan, wan ada jua nang suka adu dumba.

”Apa Lui maksudnya adu dumba nitu, baadu sama dumbakah?” takun Garbus nang kada tapi banyak tahu istilah wayahni.

“Makanya banyak begaul Bus ai, supaya jangan tatinggal banar ikam istilah urang saatni,” sahut Palui.

“Jadi apa Lui ada dumba nitu?” Tulamak sakalinya kada tahu jua.

“Adu dumba tu artinya anjur antar atau adu kasha, cuntuhnya aku dua laki bini diadu dumba urang,” sahut Palui lancar.

“Tarus kaya apa cuntuhnya Lui,” Garbus bingung.

“Kaya inilah, bini dipadahakan urang selingkuh, urang balapur ka aku langsung, jadi aku sarik banar ka bini, kemudian aku dipadahakan urang jua ka biniku bapacaran, biniku jadinya sarik banar jua ka aku. Pas kami betamuan di rumah, jadilah suami istri nang bekalahian, gara-gara diadu dumba urang, parak batimpasan dua laki bini karana masing-masing saling mandakwa, saling manuduh, untung ha ada Pak RT nang manyabari, hanyar kami tarsadar bahwa nitu ada dumba urang ja,” Palui manjalasakan banahap.

“Uh damintukah Lui kisah adu dumba urang ikam,” Tulamak mangarti.

“Sakalinya kaya nitu Lui lah, ada dumba tu, hanyar aku paham wan mangarti nah,” Garbus manggut-manggut.

“Makanya urang nang suka maadu dumba nitu amal ibadahnya kada diterima ulih Allah pada waktu malam nisfu Sya’ban kacuali bataubat kada maulangi lagi untuk salama-lamanya. Bagi nang sudah tarlanjur lakasi bataubat, sabalum tarlambat,” Palui gagarunuman.

“Bujur Lui ai, parlu urang nang kaya nitu disuruh bataubat, atau jar urang wayahni panyabar barita buhung, sahingga urang dua laki bini bisa bakalahi, bisa basarakan gara-gara parcaya wan barita buhung nitu, karana sangat mangganggu kaharmonisan urang dua laki bini,” timpal Pak RT manyahuti Palui.

“Aman dunia ni kalau sifat adu dumba nitu kada lagi di hati kita masing-masing ya, iya kalu Lui,” sindir Garbus.

“Makanya am dimana-mana urang atau pamarintah gin manyatakan perang wan barita buhung atau bahasa lautnya barita hoaks, nitu artinya barita karuamput haja, saring dahulu barita tarsabut, sabalum dikunyah-kunyah jaka ibarat makanan tu,” sahut Pak RT bijak.

“Alhamdulillah Pak RT ai, barakat pian manyabari, hanyar tahu ulun artinya barita hoaks tarsabut, imbah bakalahi nitu, kami masra pulang dua laki bini,” imbuh Palui lihum bapair.

“Han jarku Lui, rami kalu dua laki bini, imbah tarjadi parang Irak di rumah tangga, sudah nitu napa nah,” sindir Pak RT.

“Sudah nitu saparti kukang, kada handak lagi bapisah dua laki bini,” sahut Garbus lihum.

Iya haja sudah Palui naya,” timpal Tulamak.

Rami jadinya buhannya bapanderan, tujuan kada lain supaya warga masyarakat rukun, damai, apalagi manghadapi parak bulan puasa ini. (aan maulana/penulis matan kuta dudul, HSS)