Si Palui : Mati Suri

ZAMAN now wayahni bausaha pina maju ada nang manuruti. Cuntuh nyata haratan rami bakiosan di muka rumah, sakalinya ada haja nang mambangun kios sing ganalan kaya ritel moderen jua inya bangunannya, nang sarba otomatis tinggal picik haja harganya, langsung kaluaran bonnya.

Kada kaya di kios sorang bahitung bakulkulatur dahulu hanyar pina tacapat mahitungnya.

”Kaya apa Lui ikam bakiosan rami hajalah?” takun Garbus. Takulibi Palui ditakuni Garbus.

“Dahulu kulihan 500 ribu, wayahni saratus ribu ngalihan kulihan saitu ja!” ujar Palui masam muha.

“Urang sugih kada peduli wan urang susah, nang panting bangun rumah toko (ruko) nang ganal, nang modere,” sahut Tulamak pina sinis jua.

“Banyaki besabar ai lagi buhannya lah, aku marasakan banar sakitnya tuh di sini,” Palui manunjuk ka dadanya.

“Sakit pada ditinggal mati bini kaya naya kisahnya?” Garbus bisa jua manambahi.

“Tapi nang panting sabar, kada kawa ai janji diri, janji hidup sampai, ampih bakacak 500 ribu sahari, wayahni saratus ribu gin ngalih banar, iya kada Lui?” lanjut Tulamak.

“Aku bagai mati suri buhannya ai,” sahut Palui.

“Ayuha Lui ai, kada apa-apa, nang panting jangan mati bujur haja, kada bahinak lagi am,” Garbus manimpali.

Wayahni Palui rancak taungut sesuai kondisi kiosnya jua nang sunyi senyap. Urang kada baulanja lagi di kiosnya, tapi baulanja ka rumah toko nang ganal, nang banyak diskonnya, barangnya langsung matan agen di Banjarmasin sana. Kalau barang Palui manukar di kuta dudul jua, apa ya kalah bersaing.

“Mati suri aku, mati suri buhannya ai,” Palui garahuk-garahuk.

“Napa Lui ikam kana bulannyakah?” sambat Garbus.

“Mati suri te maksudnya Bus ai, hidup segan mati kada mau,hidup kada kaya bahari lagi, dahulu rami bajualan, wayahni sakit, sakitnya tuh aku di sini, mun mati kada lagi pang. Nitu ngarannya mati suri Bus ai,” Palui gagarunum manjalasakan.

“Uh paham aku Lui,” ucap Tulamak.