Cuci Uang

MACAM-macam istilah wayahni kadang-kadang berbeda dangan bahasa Banjar, bahasa sahari-hari Palui sapakawalan wan bininya di rumah. Waktu nitu babarapa hari lalu Palui katinggalan duit kulihan maantar Mama Amin bedagang amparan tatak di bulan puasa matan Kandangan ka kuta Rantau, babentor, dibari sidin upahnya saratus ribu. Kada ingat lagi maambil di kantung sampai ditapas ulih bininya.

”Aku umanya ai kada ingat maambil duit di kantung baju, saratus ribu maka ikam tapas sudah bajunya baisukan tadi iya kalu?” ujar Palui pucat ka bininya.

“Nah iya am abahnyalah, ulun tahu tapas haja, kada sampat bacalok ka kantung baju pian,” sahut nang bini takajut.

Baca: Si Palui: Di Bawah Ranjang

“Cuba pang ambil di lalaran nitu bajunya, pasti tatapas ikam nah!” Palui pina sarik.

“Kanapa pian pina sarik abahnya, ulun dasar kada kaingatan lagi bacacalok ka kantung pian karana kabiasaan te sudah pian ambil jua duit di kantung baju pian nitu,” sahut nang bini asa kesal.

“Kalau ikam tatapas duit di kantungku nitu, berarti ikam umanya ai kana pasal pancucian uang tahulah! Maka basiap-siap haja masuk panjara, nitu sudah kalakuan tindak pidana wan duit alias uang!” Palui mangijati ka bini.

Baca: Si Palui: Buang-Buang Waktu

“Kalau ulun masuk panjara pian harus umpat jua, karana nitu duit pian nang ulun tapas alias pancucian uang iyakah,” nang bini bingung mandangar ucapan Palui pancucian uang nitu umpat jua manuruti manyambatnya.
Lakas nang bini mancari bajunya nang dijamurnya nitu, pas jua ai tatapas duitnya, sudah kunyak dua buting harga 50 ribuan.

”Nah kuyak abahnya duitnya, kaya apa kada payu lagi kalu,” ujar nang bini pucat malihatakan ka Palui.

“Ni te nang kumaksud pancucian uang alias batatapas, tatapas duit, jadi buram duitnya, kuyak, luntur gambarnya nah. Kada payu lagi, becari tuhuk banar mandapati duit saratus ribu umanya ai,” Palui gagarunum.

Baca: Si Palui: Malam Nisfu

“Kada kawa ai abahnya lah, banyaki besabar haja kita naya, apalagi bulan puasa,” sahut nang bini mambisai ka laki.

“Oke lah maksud ikam nitu, aku te kalu katahuan aparat banar ai, bahwa ikam nitu malakukan pancucian uang makalahan am ditangkapnya,” Palui asa pucat jua inya.

Mandangar tetangga Palui, si Garbus wan Tuhirang bahwa Palui dua laki bini malakukan pancucian uang dilaporakan ka aparat keamanan, datangan aparat nitu wan buhannya ka rumah Palui.

”Salamat siang Pak Palui, kami dari aparat keamanan, berdasarkan laporan Garbus wan Tuhirang ni, bahwa ikam dua laki bini malakukan pancucian uang maka ikut kami ka kantur,” ujar aparat nitu tagas.

“Maaf pak, ni bini ulun tatapas duit, jadi jar ulun nitu adalah pancucian uang iyakah pak?” sahut Palui terus terang.

“Nah ikam buhannyalah, lain nang kumaksud pancucian uangnya! Nitu ngarannya tatapas duit, kalau nang bujurnya pancucian uang nitu, adalah duit hasil korupsi disimpan ka tabungan Palui atau ka tabungan bini Palui sampai saratus juta, misalnya, maka nitu hanyar disebut pancucian uang,” jalas patugas sambil tatawa.

Akhirnya lihum Palui wan buhannya nitu, asa suka kada jadi dibawa ka kantur karana salah paham haja ya?
Han jarku ada haja handak viral di medsos si Palui dua laki bini gara-gara malakukan pancucian uang, iya haja sudah. (aan maulana/penulis matan kuta dudul, HSS)