Si Palui: Dukun Betasbih

KAHIDUPAN ni matan bahari ada 2 golongan haja nang ada, yaitu golongan nang banar wan golongan nang salah atau sesat, nitu ja. Jangan ha umpat-umpatan ka golongan sesat buhan ikam. Kena ngalih kalau sudah terjerumus ka golongan sesat nitu, taubat nasukha makalahan.

”Sulit dikisahakan wayahni Bus, kalakuan mangaku alim, wali, tapi sesat,” ujar Palui ka Garbus.

“Kanapa ikam waninya Lui manyambat urang sesat ?” Garbus bingung.

“Jangan satuduh-tuduh urang Bus ai, kalu ah pencemaran nama baik, apa ngalih urusannya,” timpal Tulamak.

Kisah talu tahun lalu Palui parnah mambawa mintuhanya ka urang nang mangaku alim, wali, karana kada banyak informasi, minta banyu tawar atau betatamba ka wadah dukun nang baingkutan tasbih ganal nitu di tangannya.

”Uh mintuha Palui ada masalah napa datang kemari?” takun dakun nitu. Palui mandangarakan haja matan luar rumah.

“Aku ni handak mamintakan cucu banyu tawar supaya inya jangan lagi bahubungan wan laki-laki nang pangangguran,” ucap mintuha Palui. Dijurung butul banyu mineral ulih mintuha Palui kemudian sidin mambaca akan ayat-ayat atau mantra-mantra.

”Nah mintuha Palui ya, diminumakan kena ka cucu pian, wan ditampungasakan ka muhanya,” ujar sidin.

“Inggih pak dukun ai,” sahut mintuha Palui.

Singkat kisah, malamnya banyu pambarian dukun betasbih nitu diminumakan sidin ka cucu (anak kaka bini Palui). Napa nang tarjadi, pacar cucunya mamagati hubungan wan cucu sidin sampai saat ni kadada nang handaknya lagi. Apa pasalnya? Karana palihat lakian kada langkar lagi cucu sidin nitu, palihat lakian cucu mintuha Palui nitu marangut haja muhanya.

Han, jadi masalah pulang cucu, saminta-mintakan banyu tawar ka dukun betasbih nitu. ”Uh Ma, tasalah pinta piannya banyu ka dukun betasbih nitu, sidin haja betamat salat, alias kada salat lagi. Pian minta banyu tawar ka wadah sidin, han kada tasalah lah?”ujar Palui satangah manumpalak, tapi kada wani inya sarik ka mintuha.

“Iya aku dasar kada tahu jua pang Lui ai, apalagi sidin,tasbih haja baingkutan,” mintuha Palui asa pucat muha sidin kamnyasalan.

“Kalau kaya ni kaya apa jadinya, si Aluh Lena ini Ma?” prihatin Palui.

“Lakasi aku bawa aku, ka tuan guru, nang bujur-bujur wara supaya cucuku lakas balaki, nitu haja harapanku Lui ai?” suara mintuha Palui handak banar minta bawa.

“Ayuha mudahan sakali ni, kada tasalah lagi datang ka urang pintar, nang bujur-bujur alim, mudahan sidin tamasuk wali jua, kada sekadar penampilan haja rajin baingkut tasbih,tapi bujur-bujur istiqamah, wara’ sidinnya ya?” Palui manyahuti, lakas mambawa sidin ka rumah tuan guru tuha ampah ka kecamatan Sungai Raya situ.