Si Palui: Umpat Pargum

KADA karasaan bulan puasa nang panuh barokah sudah balalu dihadapan kita. Ampih sudah balapar parut saharian, wayahni diganti makan minum sapuasnya, sabuntaunya silakan haja kalau mau. Bisa mati kakanyangan am nitu, kontras banar wan urang di tv ada haja basanya nang kalaparan karana daerahnya tandus gersang, kada turun hujan sabulan sampai talu bulan. Di daerah kita ni alhamdulillah tamasuk daerah nang makmur, asal ditanam haja tungkat kayu tumbuh jadi tanaman.

”Uh abahnya bangun pang hari pukul dalapan sudah!” nang bini gagarahuk.

“Uu aku marut banar nah mata, handak guring haja lagi,” sahut Palui dasar marut matanya.

“Napa ni laki katuju banar malandau, waktu bulan puasa alasan begadang manunggu makan sahur, ni alasan napa pulang maka malandau tarus tiap baisukan,” nang bina hanyar tuntung betatapas.

“Uh umanya betatapas nitu, jurung ka laundry haja, tamasuk salawar cawatku kah jurung haja,” ujar Palui mamaraki ka bini sakalinya imbah bangun.

“Dasar panguler laki, salawar dalam alias salawar cawat dijurung ka laundry, nitu kada tahu disupan abahnya ai, tapas sorang haja pian!” sambat nang bini ketus.

Di sebelah rumah, bini Garbus manggarunum jua, kanapa lakinya tatap malandau maski sudah tuntung bulan puasa ni. ”Uh abahnya bangun sudah, hari pukul dalapan lewat !” ujar bini Garbus.

“Hadangi satumat, lagi asyik bamimpi,” sahut Garbus manguliat banar.

Manjinguk jua bini Palui ka rumah Garbus, napa maka kada talihat si Garbus biasa ada haja bahanu turun sampat basapida mutur lewat di muka rumahnya.

”Mana laki ikam bini Garbus?” takun bini Palui.

“Lakiku malandau haja jua bini Palui ai nah!” sahut bini Garbus.

“Uh kalu damintu sama haja wan lakiku,” sahut bini Palui.

Garbus sakalinya mangaluari ka teras rumah mandangar bini Palui galu. ”Kami ni tamasuk pargum bini Palui ai,” ujar Garbus manyahuti.

“Nah napa pulang umpat urganisasi apa ikam nitu Bus?” takun bini Palui asa takajut.

Karana pina galu, Palui mandapati bininya nang ada di teras rumah Garbus. ”Uh umanya kami tamasuk parsatuan guring malandau, disingkat pargum, napa tiap malam matan jam 11 sampai 1 dinihari manuntun partandingan sepak bola piala dunia di tv, di kios Tulamak, rami banar nonton bareng. Jadi pang malandau tarus, inya kunci rumah kubawa, jadi ikam sudah guring banar, hanyar aku datang ka rumah, jadi pang guring malandau tarus nah,” ujar Palui sambil tatawa.