Si Palui: Paling Ringan

MANUSIA banyak maski mangaku baragama Islam tapi kalakuan kada taat wan parintah agama. Kaya itulah keadaan banyak manusia saat ni.

”Napa nah nang paling ringan dilakukan manusia wayahni?” takun Palui ka Garbus.

“Nang paling ringan nitu manguap pada waktu mangantuk,” sambat Garbus saadanya.

“Nang paling ringan bila lapar makan aku,” sahut Tulamak.

“Salah samuanya, nang paling ringan wan siapa haja suah malakukannya adalah maninggalakan salat, urang marasa kada badosa, maski kada salat lagi, tatap haja tatawaan. Nang jadi tukang bentor kaya aku nih, tatap haja jadi tukang bentor, nang jadi pegawai pemerintah kah, pegawai swastakah, tatap haja inya jadi pegawai karana marasa kada apa-apa jua maninggalakan salat iyakah Bus?” jalas Palui.

“Ya begitulah Lui ai, manusia ni mun kada mati hanyar tahu rasa siksanya di alam kubur kena!” sahut Tulamak.

Bulik Palui ka rumah, mandapati bininya pna asyik malihat tv sinetron India.

”Bah iya pang ikam ni, asyik banar umanya lah, sudah salat Dzuhurkah?” takun Palui.

“Ulun balum lagi, kena haja salat Dzuhur sapuluh manit sabalum salat Asar, jadi ulun sekalian haja abahnya ai,” sahut nang bini ringan haja inya.

“Uh ikam celaka umanya ai, salat kaya nitu?” sahut Palui sarik.

“Inya napa abahnya, urang salat maka disambat celaka, ajaran apa pulang pian ni, maniniwas pada urang lain kah!?” nang bini tasinggung diusik-usik masalah salat nitu.

“Nah kaya ni, ujar Tuhan celakalah bagi urang nang malalaikan salat, apalagi kada salat sama sekali, mangartilah maksudku!” jalas Palui bahimat.

“Uh jadi ulun ni tamasuk urang lalai salatkah!?” sindir nang bini tatap haja pina sinis.

“Iya haja ah, kada marasakah ikam! Sudah sampai salat Dzuhur masih asyik manuntun sinetron, kena haja jar malaksanakan salat Dzuhur handak bagampir wan salat Asar, kalu kaya nitu baulah paraturan sorang ai ikam!” sarik Palui.

Imbah ditagur Palui pina karas nitu, lakas nang bini mamatikan ka tv nang sadang asyik dituntunnya.
”Ayuha nah daripada behual dua laki bini, labih ulun salat Dzuhur ha, balakas, kena-kena akhirnya kada salat akhirnya…,” gagarunum bini Palui, tapi hakun maasi ujar laki sakalinya.