Si Palui: PANTANGAN

BANJARMASINPOST.CO.ID - “Wah.. Busu Garbus pina baanum imbah batabas rambut,” rawa Tulamak malihat Garbus hanyar bagunting.

“Sabanarnya wayah musim panas kaya ini tadinya aku handak bagundul,” ujar Garbus sambil mamusut ka kapala.

“Imbahnya kanapa kada jadi ?” takun Tulamak.

“Tukang guntingnya nang kada hakun manggundul aku,” sahut Garbus.

“Haww.., kanapa pasalnya ?” anyak Tulamak.

“Inya waktu aku handak bagunting tu pas hari papanasannya, tangah hari. Jadi jar tukang gunting nitu, “ Ulun minta maaf banar, Pa-lah, ulun wayah hini bapantang banar manggundul urang wayah musim panas kaya ini..!”

Mimangnya kanapa sababnya,pak ? takunku (jar Garbus).

“Sualnya Ulun suah parahatan hari panas malinting, ada urang minta digundul bakarik, pas sudah tuntung, mungkin tanggurukan ulun karing kahausan, mata ulun asa raum, haraw tu panglihat ulun kapala gundul urang nang dihadapan ulun nitu buah Sumangka..! Untung haja ulun capat sadar bahwa nitu kapala urang, lain buah sumangka !” kisah Garbus wan buhannya.

“Hai..Sidinai ..!” ujar Tulamak sambil takirik mambayangakan.

“Pangalaman Garbus nitu buhannya-ai, patut jadi paringatan awan kita-kita barataan. Amun kawa jangan bagundul wayah tangah hari panas malinting,” ujar Palui sambil tatawa.

“I-ih ..,bujur banar, Lui-ai ..! Luku kapala kita dikira tukang gunting buah sumangka!” ujar Tulamak.

“Nitu buhannya-ai marupakan pantangan nang Partama!” calatuk Tuhirang.

“Mimangnya adakah lagi pantangan nang kadua, Tuhirang ?” takun Tulamak handak tahu.

“Pantangan nang kadua, ini bardasarkan pangalamanku saurang,” ujar Tuhirang.

‘Saparti biasanya bila musim kamarau landang, kulam atau danau-danau di kampungku di hulu sungai sana banyunya linting (surut) kakaringan. Nah.., wayah nangkaya itu biasanya iwak manau, maka urang kampung pun turunan ka kulam/danau gasan manangguki iwak nang manau tarsabut. Mintu jua aku kada katinggalan bakucau. Waktu itu aku turun ka kulam batilasan tapih haja. salawar kupacul supaya kada tadubul kaina manapas tilasan. Satalah ba-jam-jam barandam di banyu karuh nang sabatas pinggang nitu, aku marasa batisku mudil manjajak kain. Bagitu kain nitu kuambil, lalu kukucak-kacak, sakalinya kain nitu barupa tapih. Tapi balangnya kada pati jalas lantaran inya bacalumut lumpur. Tapih nitu lalu kutating-tating sambil aku bauwar-uwar, “Huii.. ini tapih siapa ..? Ini tapih siapa ...?’. Tapi karna urang-urang lagi asyik manangguki iwak, jadi kada nang mamparhatiakan awan uwaranku. Aku lalu banaik ka tabing sambil bauwar-uwar pulang nyaring-nyaring, ‘Huii..Ini tapih siapa ..?! Ini tapih siapa ..?!!’