Si Palui: Kamarau

AIR mata jar urang hulu sungai naya banyu mata sangat deras mangalir matan mata nang basah karana manangis. Wayahni, lagi musim karing, tanah pahumaan bangkang atau karingan. Tanah kabun, tarnak jua kahausan kaya nitu manusia turut dahaga kahausan ngalih mancari banyu.

”Air mata pun mangalir , mata air nang mangalir, panas gersang bumi ini tiada banyu satitis,” Palui gagarunum.

“Rasa panas banar nah harinya?” Garbus jua takuringis.

“Han kalu marasa harinya panas, dahulu racap hujan, pina kalihatan rumput gin layuan, tanah jadi gersang jua,” sahut Palui.

“Baiknya kita bukah ka tuan guru haja betakun ka sidin kanapa hujan lawas kada turun?” ucap Tulamak.

“Parasaku kena haja dahulu bapadah ka tuan guru, kita ka wadah mantri kesehatan dahulu, apa nang baik dilakukan pada hari panas,” saran Palui.

“Ayu kita ka sana,” ajak Garbus wan Tulamak sakalinya.

Batalu buhannya ka wadah mantri Arman nang racap didatangi warga masyarakat terutama nang garing-garing baik kalangan urang tuha maupun buhan nang anum, lakian wan binian katuju baubat ka mantri Arman.

”Uh pak mantri, apa nang baiknya dilakukan pada waktu kumarau naya?” takun Palui.

“Saranku Lui ai, wan buhannyalah, hati-hati minum banyu putih jangan nang kada bajarang bisa sakit parut, artinya panyakit diare bisa mangancam wan kita,” jawab mantri.

“Apalagi pak mantri?” takun pula Garbus.

“Jangan minum es talalu banyak, kalu ah sakit parut akhirnya ya kana panyakit diare, ngalih kena maubati kalau sudah tuha naya, bila panyakit sudah bahinggap di awak?” sahut sidin takarinyum.

“Bah iya am, kada payu lagi ya paman es,” ucap Palui.

“Bulih haja minum es tapi jangan talalu banyak, hati-hati jua kalu banyunya kada bajarang maklum manukar es di pinggir jalan,” saran mantri.

“Tarimakasih pak mantrilah, banyak saran pian, mudahan kami kada tamasuk nang kada panyakit diare pada musim kumarau naya,” Tulamak manyahut.