Si Palui: Tatangis

Alhamdulillah, doa Palui takabul jua. Lawas banar sudah badoa sakira dikiau oleh Nabi Ibrahim, rupanya hanyar aja dapat panggilan. Anak-anaknya nang balima, lalakian sabarataan, dikumpulakannya limbah sambahyang Magrib.

“Nah, kakanakan sabarataan,” ujar si Palui, “Tahun ini abah lawan mama handak tulak naik haji. Jadi ikam-ikam sapaadingan babisa-bisaai di rumah, jangan barungkis bakalahian.”

Mandangar si Palui handak tulakan, basurakan ai anak-anaknya.

“Ulun umpat..! Ulun umpat...! Ulun umpat...!” ujar anak-anaknya nang balima.

“Cuba dangarakan bujur-bujur,” ujar Palui, “Tadi sudah abah padahakan, nang tulak itu abah lawan mama aja kalu? Jadi ikam-ikam nang balima ini tinggal sabarataan! Jaga rumah! Jaga apa nang tatinggal!”

Haaaan..! abah”, ujar anaknya nang panuhanya, “Kalu nyamannya lalu kami-kami ini ditinggalakan.”

“Kada kaya itu pang. Nang paling wajib naik haji itu kada ikam-ikam pang, tapi abah lawan mama. Kaena kalu sudah sampai nisapnya, dan ada kamampuan, ikam-ikam sabarataan ini insyaallah abah hajiakan jua,” jalas Palui.

“Awas bah ai pian. Ini kami anggap janji..!” ujar nang panuhanya pulang.

“Kami hakun aja batinggal, asal dibawaakan oleh-oleh,” ujar anak nang kadua.

“O000, itu soal gampang,” ujar si Palui, “Bapasankah, kada bapasankah ikam, musti abah tukarakan jua. Tagal cuba abah catat, masing-masing handak bapasan apa?”

“ Ulun tukarakan jam tangan amas,” ujar nang panuhanya.

“Ulun jam tangan amas jua, tapi nang kada bisa rusak,” ujar anaknya nang kadua.

“Ulun tukarakan …. utas bamata mutiara,” ujar nang katiga.

“Ulun utas amas putih,” ujar nang kaampat.

Palui mencatati pasanan anak-anaknya nang baampat. Tinggal saikung lagi si bungsu. Dihadang-hadang oleh si Palui, tapi inya kada sing ucapan.
“Ikam pang nak,” ujar si Palui manakuni si bungsu alias anaknya nang kalima, “Apa pasanan ikam?”

Mandam inya. Rasa ngalih kalu handak baucap.