Si Palui: Ulangan Tarus

PALUI tamasuk bauntung. Barakat sabar umpat mahonor jadi guru dikampungnya, akhirnya inya umpat jua diangkat jadi guru tatap. Walaupun pangkatnya paling randah, tapi tamasuk nyaman jua ada jaminan hidup gasan tuha kaina.

"Lain jua panampilan kawal kita ni Bus ai salawas jadi guru," ujar Tulamak mamuji Palui nang babaju pagawai.

"Lain napanya Mak, biasa haja aku ni," ujar Palui marandah.

"Bagagah ikam Lui ai amun babaju dinas tu," ujar Garbus maambung.

"Karna bubuhan ikam kawa manyanangakan hatiku, wan kabujuran limbah gajihan, ayu kita makanan ka warung," ujar Palui mambawai makanan.

"Wayahini jadi guru tamasuk nyaman Lui lah? ujar Tulamak sambil muntungnya kiyap-kiyap.

"Napa nyamannya, cuntuhakan pang Mak!" ujar Palui.

"Aku mambaca disurat kabar gaji guru wayahini sudah ganal, kada kaya dahulu babaya cukup gasan hidup haja," ujar Tulamak pulang.

"Makanya Palui wayahini pina kulir-kulir maujik limbah gajinya banaik tarus," ujar Garbus jua.

"Makanya wayahini urang barabut handak jadi guru, Salain gajinya banaik tarus, babinian wayahini katuju jua kawin lawan guru," ujar Tulamak.

"Buhan ikam tahu lah apa sabab bibinian wayahini barabut balaki guru?" ujar Palui manakuni Garbus wan Tulamak.

"Nang jalas masa dapan tajamin, lawan pahala jadi guru ganal jua," ujar Tulamak manjawab.

"Bujur haja Mak ai, tapi jawabannya lain itu," ujar Palui.

"Napa sababnya Lui?"

"Ingat wayah sakulah dulu kalu? Bubuhan guru itu katuju banar mambari ulangan. Ada nang saban hari ulangan tarus. Nah... kalu urusan di ranjang, bibinian tu katuju nang baulang-ulang tadi," ujar Palui lihum.

"Amun dukter 3 x sahari haja, tapi guru bisa baulang-ulang," sambung Palui.

"Bujur banar... bujur banar," ujar Tulamak wan Garbus maakuri (bpost/fai)