Si Palui: Kadap Sabalah

BANJARMASINPOST.CO.ID - TIAP hari Ahad Palui wan bininya parak saharian kadada di rumah. Gawiannya maujek tapaksa ditinggalakannya gasan mahurmati kakawalannya nang basaruan.

Ada nang basaruan mangawinakan anaknya, kada cuma saikung tapi babarapa kaluarga, ada arisan dan ada jua nang manyunat anaknya.

“Hari ini kita saruan bakuliling mulai di hulu lalu ka hilir imbah itu hanyar baputar ka subarang,” ujar Palui.

“Kuat hajalah sampiyan,” ujar bininya batakun.

“Anggaplah hari ini aku ma-arak bini kasayanganku kuliling kampung,” sahut Palui.

“Sudah gawian sampiyan pang hari-hari ma-arak bibinian di balakang ujek,” ujar bininya pina camburu.

“Nah...... camburu kalu? Ayu kita tulakan pamulaan ka rumah mamarina Garbus, imbah itu ka wadah pambakal,” ujar Palui sambil mamasang kacamata hirangnya.

“Jangan talalu laju abahnya, singggang galungku ditiup angin,” ujar bininya. Imbah saruan di rumah pambakal lalu Palui wan bininya manarusakan ka subarang saruan ka rumah kawannya maujek.

“Sudah tabiasa karas mangacak gasnya,” sahut Palui.

“Tabiasa mambawa bibinian, bila laju lalu inya maragap ka-awak sampiyan,” sahut bininya sambil mangibit bahu Palui.

“Umanyaaa........umanyaa........kanapa maka panjanakku asa kadap,” ujar Palui bakakajutan.

“Kadap napa, maka hari sing tarangan. Kalu rasa kada kawa manarusakan basapida mutur maka kita bamandak,” sahut bininya.

“Kadapnya........ rasanya kadap saparu haja,” ujar Palui pulang.

“Kalu kadap kada mungkin bapaparuan,” ujar bininya, langsung manggasak manyuruh Palui bamandak.

Imbah bamandak, Palui langsung manyandarakan sapida muturnya sambil baucap: “Rasanya masih kadap haja pamandanganku, kadap sabalah.”