Si Palui

Si Palui: Tajumput Rimut

Wayah urang di kampung rami mangaridit sapida mutur, inya batagih jua wan lakinya minta tukarakan jua sapida mutur nang mudel hanyar.

Si Palui: Tajumput Rimut
DO/banjarmasin post
Si Palui Tajumput Rimut 

BANJARMASINPOST.CO.ID - BINI Palui tamasuk urang nang katuju maumpati parkambangan jaman. Wayah urang di kampung rami mangaridit sapida mutur, inya batagih jua wan lakinya minta tukarakan jua sapida mutur nang mudel hanyar.

Parnah jua wayah malihat artis-artis di tivi basamir rambut, umpat jua inya bahabang-habang rambut. Pukuknya napa haja nang hanyar atawa mudel, inya pasti langsung takisir lalu handak situ-sini umpat manukar.

Kada lawas tadi bini Palui batagihan talipun ganggam alias HP, Karna urang subalah manyubalah rumah sudah baisian. Bini Tuhirang wan bini Utuh Garbus haja bilang tating-tating wan HP, walaupun gawiannya cuma bajualan iwak di pasar.

"Bujur ujar ikam itu umanya ai, kita jangan hakun katinggalan zaman. Malah aku sudah baniat manukar," ujar Palui.

"Hi-ih, supaya kita kawa bapander dan bahubungan tarus, kemanapun tulak makanya lajui manukar ituuu... talipun nang kada batali," ujar bini Palui.

"Wayah ini lalakian, bibinian, tuha anum dan kakanakan samunyaan sudah baisian HP," ujar bini Palui minta tukarakan HP.

Ahirnya Palui umpat jua manukar HP. Sabuting gasan bininya dan sabuting dipakainya saurang. Karna kahimungan baisian HP hanyar maka Palui wan bininya itu haur batalipunan tarus. Tapi hari ini inya bahual dan bakalahian wan bininya itu karna marasa lakinya kada hakun manarima kiyauannya.

"Rupanya karna ka-asyikan wan bibinian di kantur bajalanan kamana-mana maka saharian ini ikam kada hakun dikiyau-kiyau lagi di HP," ujar bini Palui sarik.

"Sumpah nah, saharian ini aku bagawi di kantur haja, sama sakali kadada mandangar HP-ku babunyi," ujar Palui.

"Kada mungkin, ikam pangaramput. Kada mungkin HP-nya mati karna hanyar haja distrum. Kalu kada handak ba-HP lagi, kita ampihan haja. Mana HP-nya, kita jual haja," ujar bininya mangakasi kantung Palui lalu ma-ambil HP-nya.

"Astaga... pantas haja aku sama sakali kadada mandagar bunyi HP panggilan ikam itu ding ai karna nang kubawa itu lain HP tapi aku tajumput rimutnya TV," ujar Palui manunjuk rimut nang diganggam bininya.

"Maaf kaka lah, ulun kalajuan mandakwa sampiyan," ujar bininya baungah wan Palui. (emhati/repro)

Editor: Elpianur Achmad
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved