Si Palui

Si Palui: Bakuliling Jakarta

Palui disaru Julak Ambrun, mamarinanya nang ada di Jakarta. Julaknya itu handak mangawinakan anak sidin nang panuhanya.

Si Palui: Bakuliling Jakarta
BPost Cetak
Si Palui Edisi BPost Sabtu (13/7/2019) 

BANJARMASINPOST.CO.ID - Palui disaru Julak Ambrun, mamarinanya nang ada di Jakarta. Julaknya itu handak mangawinakan anak sidin nang panuhanya.

Karna Palui adalah kamanakan nang paling disayangi sidin, sabarataan ungkus dibayarakan ulih julaknya. Palui sabujurnya handak baindah, tapi asa kada nyaman jua karna julaknya bapaksaan banar.

Imbah acara bapangantinan, talu hari Palui umpat badiam di wadah julaknya. Palui asa muyak jua bahinip di rumah, handak jua marasani bajajalanan bakuliling malihat kamajuan kota urang.

"Julak... ulun handak batakun. Karna sudah parak saminggu ulun di Jakarta ini, parak saminggu jua ulun bagana haja di rumah. Tampulu di sini, handak jua ulun bakunjangan nangkaya urang. Kaina bulik ka Banjar, kada sawat kamana-mana," ujar Palui bapadah wan julaknya.

"Ayu ja ikam bajalanan, aku kada manangati jua. Tapi aku kada kawa maantarakan, karna awakku asa uyuh banar imbah bakawinan tadi," ujar julak Ambrun.

"Inggih, ulun kada handak mangalihi pian jua julak ai. Kaina ulun naik angkutan haja, tapi ulun minta patunjuk pian nangkaya apa manujunya supaya kada sasat," ujar Palui.

"Ikam bajalan haja sadikit ka luar komplek, lalu belok ka kanan ka tarminal di sini nah, ngarannya tarminal kota. Di sana ikam tasarah haja mamilih nang jurusan mana, kaina tabulik jua ka sini," ujar julaknya manarangakan.

Lalu tulak ai Palui ka tarminal nang disambatakan julaknya. Sawat bingung jua inya handak naik nang mana, karna kalir taksinya kada sama wan di Banjar nang bakalir kuning sabarataan. Di sana kalirnya ada habang, biru wan hijau.

"Tasarah haja sudah, aku handak bakuliling haja jua," ujar Palui dalam hati. Lalu inya babuat nang warna biru.

Imbah sapuluh manit mahadang, taksinya hibak lalu bajalan. Di tangah jalan supirnya bapandir: "Wahidin ada?" ujar supir manakuni. Lalu ada nang manyahut... "ada, ada kiri pir!" imbah itu taksinya bamandak lalu panumpang itu kaluar.

Nangkaya itu jua wayah di jalan Sudirman wan jalan Thamrin, supir batakun pulang ka balakang. Turun pulang nang lain, Palui haja lagi tatinggal saurangan sampai taksinya babulik ka Tarminal Kota pulang. Sampai talu kali baputar pulang pargi, si supir bingung malihat Palui kada turun-turun.

"Bapak sebenarnya mau kemana? Kok sudah tiga putaran nggak turun-turun," ujar supir manakuni Palui.

"Nangkaya apa handak turun, nama saya balum dipanggil," ujar Palui bamamai tacampur-campur bahasa. "Nama saya Palui, P-A-L-U-I," ujarnya maija-akan.

"Wah bapak Palui pasti salah paham. Ini bukannya absen, yang saya panggil tadi bukannya nama penumpangnya tapi nama jalan yang dilalui oleh angkot ini," ujar supir taksinya takurihing paham wan kalakuan Palui. (ivd)

Editor: Hari Widodo
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved