Si Palui : Duit Ganal

BANJARMASINPOST.ID - SUDAH kabiasaan Palui wan kakawanannya, imbah tuntung sembahyang Jumahat lalu batahan satumat umpat manggani’i kaum manyimpunakan hambal, tikar, sajadah dan mangumpulakan kutak celengan. Imbah tuntung basisimpun itu lalu bubuhannya barabahan sambil bapapanderan ka hulu ka hilir.

"Bubuhan ikam kada umpat mahitung duit celengankah Lui?" ujar kaum masigit mambawai.

"Ayu bubuhan sampiyan haja," sahut Palui.

"Kanapa maka kita kada manggani’i Lui?" ujar Tulamak.

"Aku kulir kalu kaina pina tahilap-hilap Mak ai. Duit itu adalah sumbangan urang gasan masigit, badosa kalu tajumput atawa tasalip-salip ka kantung. Kalu bubuhan ikam handak manggani’i, silakan haja. Aku kada umpat," ujar Palui.

"Dasar putih hati Palui, mustinya mambantu mahitung duit sumbangan urang di celengan itu bapahala tapi inya malah takutan kalu tahilap-hilap jadi dosa," ujar Garbus.

Wayah bubuhan Garbus wan Tulamak manggani’i mahitung duit celengan, si Palui malah mangaruh taguring di higa mimbar parak paimaman. Di higa awaknya ada tuyukan sajadah wan kupiahnya. Imbah tuntung mahitung, lalu bubuhannya manggarak Palui mambawai bulikan.

"Lui ayu lakasi kita bulikan, hari siang banar, parut sudah lapar," ujar Tulamak sambil manggamit awak Palui.

"Bubuhan ikam bapahala, aku sigar karna sawat guring," ujar Palui sambil tangannya mahahar-hahar mancari sajadah wan kupiahnya.

"Itu naah... kupiah ikam takipai ka parak mimbar. Mungkin tatarik kain pasahapan wayah dilipat tadi," ujar Garbus manunjuk lalu ma-ambilakan kupiah Palui itu.

Sabalum mamakai kupiahnya, Palui mambuka-buka lipatan kupiahnya, sambil bapikir dan pina sambil maingat-ingat...

"Napa dipikirakan Lui, lakasi puruk kupiahnya," ujar Tulamak. "Anu..., siapa tadi mamindah kupiahku?" ujar Palui.

"Kami kadada nang mamindahnya, maka tadi kusambat mungkin umpat tatarik kain pasahapan wayah digulung kaum," ujar Garbus.

"Adakah nang hilang maka pina bingung," ujar Tulamak.

"Anuu... duitku lambaran Rp100 ribu nang kusalipakan di kupiah ini kadada lagi," ujar Palui pina handak manangis.