Si Palui : Inisiatifnya Kadada

BANJARMASINPOST.CO.ID - PALUI tamasuk bauntung, rancak banar dibawa pambakal atawa camat maninjau, atawa disuruh umpat panataran ka Jawa atawa ka kuta-kuta lainnya. Bahanu sampai batangah bulan hingga bila inya bulik ka banua, pina ada haja suara atawa bahasanya pina manyahirip bahasa urang.

Umpamanya, bila ka Makassar lalu pina tadangar inya bapander bahasa Bugis, antekama, manre, tajoka-joka. Atawa bila inya ka Sunda atawa ka Bandung pasti pina lancar manyambat kumaha, kunaon, matur nuhun.

Kaya itu jua bila inya datang matan betawi lalu kaluarlah ucapannya gue-gue, lu ... lu, ke mane, atau cas cis cus babapander bahasa Indonesia atawa bahasa asing, macam-macamlah.

"Kanapa maka sampiyan lakas banar katularan bahasa urang. Tapi biarpun sampiyan tulak atawa madam sampai ka Tambilahan atawa ka Selangor sana, pasti kada kawa diubah lagu kalua-nya," ujar nang bini mahapak.

"Itulah tandanya jauh bajalan banyak dilihat dan banyak pangalaman," ujar Palui.

"Jauh bajalan, banyak nang dilihat dan banyak pangalaman tapi kada biasa babawaan," ujar bininya.

"Dimaklumi haja umanya ai, kamana-kamana itu barakat dibawai urang, rami bajalanan, guring di hutil, makanan dijamin dan dapat duit ruku," ujar Palui himung. "Ayu umanya lakasi kita makanan, parutku sudah lapar banar," ujar mambawai bininya.

Palui langsung mambuka tutudung, mangaut nasi lalu mancari’i sambal lumbuk padas kasayangannya. "Uiii ... umanya, mana sambal lumbuk kasukaanku," ujar Palui mangiyau bininya.

"Hari ini ulun kada baulah sambal karna sudah dua hari ini urang kadada bajualan lumbuk, musim panghujan banyak lumbuk nang matian dan buahnya guguran," ujar bininya.

"Itu artinya ading kadada inisiatif, bainisiatiflah, jangan kada ingat bila kadada lumbuk bainisiatiflah," ujar Palui manyuruh bininya sambil tangannya manyuap nasi.

Isuknya, imbah bulik matan bagawi, Palui langsung sembahyang lalu basiap handak makan. Kaya biasanya inya mulai mambuka tutudung makanan sambil maitihi iwak, nasi wan gangannya.

"Uiii ... umanya, umanya, ingatlah ikam pasanku samalam, bila kadada lumbuk bainisiatiflah supaya tapaluh jua makan," ujar Palui mangiyau bininya.

"Ampun maaf abahnyalah, ulun ingat haja pasan sampiyan itu tapi inisiatifnya kadada pulang, sudah tuhuk ulun takunakan wan kios-kios sayuran tanyata kadada urang bajualan inisiatif itu," ujar bini Palui pina bingung.

"Ikam pahamlah napa nang kumaksud wan insiatif itu?" ujar Palui maanyaki bininya karna dilihatnya pina bingung.

"Inisiatif itu maksudnya lumbuk rawit kalu abahnya?" ujar bini Palui manjawab.

"Hahaha ... hahaha ...," ujar Palui paham bahwa bininya kada mangarti arti inisiatif. Dikiranya inisiatif itu adalah lumbuk gasan maulah sambal. (emhati/repro)