Si Palui: Mariyuana

BANJARMASINPOST.CO.ID - SUDAH samingguan nangini si Palui pina marista. Inya barabahan haja di ranjang wan kada tapi mau makan. Ujar habar Palui lagi kecanduan maisap wan mamakai narkuba atawa ubat tarlarang lainnya.

"Mamakai ganja atawa narkuba itu kada bulih Lui ai. Ikam tahu saurang kalau pasan Tuan Guru di kampung bahwa mamakai narkuba itu haram hukumnya, karena bisa maulah urang nang mamakainya kacanduan wan bisa maulah gila," ujar Garbus nang bailang wan Tulamak imbah malihat si Palui pina pusang di ranjang.

"Apa nang dipadahakan Garbus itu bujur, Lui ai," jar Tulamak pulang mamadahi. Sudah banyak cuntuh wan kurban nang baguguran jadi kurban akibat mamakai ganja, hiruin atawa janis narkutika lainnya.

"Tapi aku bisa kada kawa lagi malapas, sahari haja gin aku kada batamuan atau malihatnya awak nangini rasanya lamah banar," ujar Palui manyahut.

"Itu akibat ikam sudah kacanduan barang haram nangitu," ujar Tulamak pulang.

"Sabaiknya ikam Lui ai, ampih ha sudah mamakai barang haram nangini, kasian jua nah aku malihat ikam marista nang kaya ini," ujar Garbus.

"Labih baik ikam bawa ulahraga Lui biar sigar, kita sudah lawas kada main bal kalu," ujar Tulamak.

"Aku kada kawa, aku kada mau malapas apalagi sampai maninggalakannya. Labih baik mati haja daripada kahilangan si Mariyuana nangini," ujar Palui sambil maringis kasakitan maingkuti kapalanya.

"Baingat Lui, baingat dingsanak. Ingat pasan Tuan Guru Lui ai, bunuh diri tamasuk dusa ganal," ujar Garbus manyabari si Palui.

"Pukuknya dimapa caranya, aku kada rila kahilangan Maaariiiyuuaanaaa," ujar Palui sambil bakuciak sing nyaringan.

"Bawa bazikir, Lui. Ingat lawan Tuhan wan Pagustian!!!! Tuhan itu mandatangakan panyakit musti mandatangakan jua ubatnya, lamun ikam mau ampih mamakai barang haram nangini ikam pasti waras," ujar Tulamak mambari nasihat.

"Ikam rancak sudah kalu Lui, manuntun tipi atawa membaca kuran bahwa hukuman baik pangidar, pamakai atawa nang maulahnya hukumannya bisa takurung batahun-tahun di panjara. Cuntuhnya nang kaya si Curbi si Ratu Mariyuana urang Australi nang tahukum 20 tahun nangitu," ujar Garbus mangisahakan.

"Aku ingat haja lawan Tuhan, sabab sambahyang nang wajib gin aku gawi tarus. Aku gin pasti kada masuk ka panjara nang kaya si Curbi nangitu, sabab kadada jua barang buktinya," ujar Palui pulang.

"Kanapa bisa nangkaya itu Lui," ujar bubuhannya pulang.

"Sabab kacanduan aku sabanarnya karindangan lawan si Mariyuana anak Haji Dulah nang lamak mungkal di kampung sabalah nangitu. Karna karindangan wan si Mariyuana itu, aku kada banafsu makan, sampai awak pina manggaring," ujar Palui pina supan.

"Uuuu..., jadi kacanduan ikam nangini karna karindangan lawan si Mariyuana nang lamak mungkal itukah," ujar bubuhannya sambil tatawa mengalakak. (repro)