Si Palui

Si Palui : Bacabut Huban

KAMARIAN itu Palui pusang banar, tangannya kada ampih-ampihnya bagaru ka kapala. Bahanu inya baduduk, bahanu badiri lalu bacaramin

Si Palui : Bacabut Huban
Dok Banjarmasinpost.co.id
Si Palui : Bacabut Huban 

BANJARMASINPOST.CO.ID - KAMARIAN itu Palui pusang banar, tangannya kada ampih-ampihnya bagaru ka kapala. Bahanu inya baduduk, bahanu badiri lalu bacaramin maitihi rambut di kapala. Babarapa kali inya mangiyau bininya tapi kadada manyahut, lalu inya balinjang pulang sambil tangannya tatap manggaru kapala.

"Uiiii, umanyaaa ...," ujar Palui mangiyau banyaring. Kamamuyakan mangiyau maka didatanginya bininya itu ka dapur, sakalinya bininya dasar bujur awur banar bamasak. Imbah itu inya jinguk-jinguk ka luar jandela, dilihatnya si Nanang anaknya Ubeh di subalah rumah. lalu dikiyaunya kamanakannya itu.

"Ada apa kayi sampiyan manyiyau ulun, apakah handak mambari duit?" ujar si Nanang.

"Ikam ini halus-halus sudah tahu diduit, kalu handak duit atawa handak upah bagawi dahulu" ujar Palui.

"Ulun hakun haja bagawi asal diupah," ujar Nanang.

"Kapalaku gatal banar Nang ai, ikam ambilakan surui lalu garuakan kapalaku wan cabutakan hubannya. Bila dapat sabilah huban ku-upah sabuting gaguduh," ujar Palui.

"Rebes kayi ai, ayu sampiyan barabah kaina ulun surui dan ulun cabut bila ada hubannya," ujar Nanang.

Karna kanyamanan digaru dan dikarik kayakih di kapalanya, maka Palui taguring-guring. Si nanang tuhuk mancari hubannya hanya tadapat sabilah. Lalu inya bapikir kalu cuma dapat sabilah makan upahnya cagar sabuting gaguduh haja. Imbah bapikir itu lalu huban nang sabilah tadi ditataknya jadi ampat, artinya inya cagar mandapat ampat bigi gaguduh. Ka-ampat tatakan huban itu diandaknya diatas mija, lalu ditinggalakannya mandi.

Kada lawas Palui bangun, diitihinya ada ampat bilah huban di atas mija, inya curiga kanapa hubannya handap-handap. Sambil manyiapakan gaguduh di dalam tutudung lalu dikiyaunya si Nanang.

"Nanang, ui Nananggg ... ini nah upah mancabut huban," ujar Palui mangiyau kamanakannya.

"Upahnya ampat bigi gaguduh kayi ai, karna hubannya ampat bilah," ujar Nanang.

"Itu nah dalam tutudung upahnya, lakasi ambil dan makan habisakan," ujar Palui manyuruh.

Si Palui : Bacabut Huban
Si Palui : Bacabut Huban (Dok Banjarmasinpost.co.id)

Si Nanang laju mambuka tutudung, tapi inya takajut banar karna cuma sabigiannya dan sudah batatak-tatak.

"Kayi, ui kayi kanapa maka sabigiannya dan sudah batatak ampat? Padahal ulun mancabutakan huban sampiyan ampat bilah artinya ulun dapat upah ampat bigi gaguduh," ujar Nanang manuntut.

"Kada usah mambunguli nang tuha Nang ai, huban nang ikam cabut itu kada ampat bilah tapi sabilah haja. Makanya, upahnya sabigi gaguduh haja. Supaya adil maka kutatak ampat kaya ikam jua manatak sabilah hubanku jadi ampat bagian," ujar Palui kada hakun kalah malawani kamanakannya. (mht/rep)

Editor: Didik Trio
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved