Si Palui

Si Palui : Marasani Haja

SUDAH labih satangah bulan puasaan, tapi Tulamak kada parnah umpat sambahyang tarawih apalagi batadarusan di masigit. Anihnya wayah babuka di masigit

Si Palui : Marasani Haja
Dok Banjarmasinpost.co.id
Si Palui : Marasani Haja 

BANJARMASINPOST.CO.ID - SUDAH labih satangah bulan puasaan, tapi Tulamak kada parnah umpat sambahyang tarawih apalagi batadarusan di masigit. Anihnya wayah babuka di masigit inya umpat tarus, tapi imbah sambahyang maghrib inya pasti hilang kada sing cangulan lagi.

"Aku kadada waktunya Lui ai, karna aku sibuk mambantu bini maulah wadai, ma-antar ka pasar lalu maharagu anakku nang masih halus," sahut Tulamak wayah ditakuni Palui kanapa kada parnah umpat batarawih di masigit.

"Ba-amal bulan puasa ini baik banar Mak ai, pahala kita dilipatgandakan Tuhan," ujar Palui.

"Bauntunglah ikam nang kawa manggawi samunyaan amalan, tapi aku basyukur jua masih kawa manggawi nang wajibnya," ujar Tulamak. "Tarus tarang haja Lui ai walaupun gawianku banyak tapi alhamdulillah kadada puasaku nang pacah, mudahan tuntung sampai kahujung," ujar Tulamak.

"Aku basyukur jua kalu ikam bujur-bujur kawa puasa sampai sabulanan, tapi ampun maaflah Mak kanapa maka samalam ikam kulihat babarapa kali mamasukakan sendok ka muntung," ujar Palui.

"Dimana ikam malihat aku makan?" ujar Tulamak.

"Samalam hulihat dihalaman rumah ikam, kulaihat ikam sambil manggendong anak lalu babarapa kali manyuap," ujar Palui. "Samalam itu aku mambari makani anak karna inya manangis banar maka langsung kugendong. Karna buburnya panas banar maka sabalum kusuapi bubur itu kutiup supaya dingin," ujar Tulamak.

"Kalu sahibar maniup bubur panas kada parlu manyulum sendoknya ka dalam muntung," ujar Palui.

"Tapi kulihat imbah maniup itu, muntung ikam babarapa kali kiyap-kiyap," ujar Palui. "Cuma sakali dua kali haja kicap-kicap. Aku kicap-kicap itu karna habis marasani masin atawa padasnya," sahut Tulamak.

"Kalu cuma maniup atawa marasani buburnya kada parlu sampai manyulum sendoknya kamuntung. Apalagi sampai batangah piring habis gasan marasani haja," ujar Palui.

"Itu tandanya sayang anak Lui ai, anakku itu bila kada dibari cuntuh makan maka inya kada hakun makan," ujar Tulamak sambil lihum bapair.

"Pantas haja abahnya lamak bulat kaya guguling hanya gara-gara umpat marasaniakan bubur anaknya," ujar Palui mahuhulut Tulamak si jago makan nang kada pamuasa. emhati(repro)

Editor: Didik Trio
Ikuti kami di
KOMENTAR

BERITA TERKINI

© 2020 TRIBUNnews.com Network,a subsidiary of KG Media.
All Right Reserved