Si Palui: Palui Hakun Beobat Gratis

BANJARMASINPOST.CO.ID - Rahatan subuh, dingin, hari pina rintik-rintik bakas hujan malam tadi. Ayam pina rami sudah batangkook menandakan matahari mulai timbul. Si palui masih aja belingkur di kaguringannya.

Awaknya manggatar, tiga lapis sudah tapih diulahnya selimut masih aja menggatar. Di japai bininya awak si palui pina langat, hancap bininya maambil akan obat lawan banyu minumnya.

“Ui abahnya. Bangun minum obat dulu,” ujar bini Palui.

Babangun ai palui meminum obat nang disediakan bininya tadih

“Kenapa pian abahnya, apa nang pian rasa,” ujar nang bini menakuni.

“Rasa kedinginan banar ai, maraga malam tadi pang hujan sing labatan kalo,” sahut Palui.

“Awak pina langat abahnya ai, kita bawa ke dokter ai kena siang-siang lah amun pian masih kakaya ini aja,” ujar bini palui.

Imbah minum obat Palui pina banyaman sudah, kada tapi manggatar lagi. Nang bini tulak dah ke pasar turun ai jua si Palui ke warung sambil batapihan. Sampai di warung palui tatamu lawan Tulamak.

“Umai Lui, pina mamucat muha nah, garing kah?,” ujar Tulamak.

“Nah, pas banar di balai desa urang meadakan pemeriksaan kesehatan gratis”, ujar acil warung.

“Bujuran kah cil, amun kayaitu tulak ai ulun ke sana nah mambawa Palui,” ujar Tulamak.

“Ayuha kada papa lui ai,” ujar Tulamak, sambil mahirit Palui ke balai desa.

Pas banar belum ada nang bapariksa, Palui dapat nomor antrian nang pamulaan. Pas dikiyau urang handak bukah Palui kalu disuntik urang. Babaya kaluar dokternya tambah menggatar tapi langsung hakun beperiksa. Bingung Tulamak melihat Palui hakun beperiksa. Tuntung beperiksa, Palui keluar ruangan pina himung sehat banar dah, tambah bingung Tulamak.

“Disuntik urang tadi lah ikam lui?” ujar Tulamak betakun.

“Hiih disuntik tadi aku, di burit,” sahut Palui.