Si Palui : Sama Untingan

BANJARMASINPOST.CO.ID - SAMALAM dikisahakan bahwa Palui tatangkap basah ulih Ketua RT wan Garbus Tulamak wayah malam itu inya bailang ka rumah Ruhana. Didapati Palui hanya baduduaan di ruang tamu rumah Ruhana karna abah umanya Ruhana paharatan mudik ka pahuluan.

Wayah ditakuni katua RT, Palui kada manjawab, inya hanya badiam haja dibawa ka kantur Pambakal diiringi Garbus wan Tulamak.

Katua RT manuduh Palui ma-akal, pura-pura bailang bakakawanan karena di palatar tadapat babarapa pasang sandal wan kalum. Tanyata Palui saurangan haja. Karna dikira bailang bakakawanan maka bubuhan RT kada curiga wan Palui nang indehoi wan Ruhana.

“Napa maka pina masam muha Lui?” ujar Pambakal manakuni Palui wayah dilapurakan katua RT.

“Palui bujur-bujur dapat musibah Pambakal ai, padahal inya urang baik kadada cacat celanya,” ujar katua RT.

“Mangaku haja Lui ai bahwa ikam basalah. Kalu ikam mangaku kaina kita urus wan abah umanya Ruhana,” ujar Pambakal.

“Hi’ih, diurus supaya badamai, kalu parlu dikawinakan,” ujar katua RT nang manangkap.

“Napa alasan bubuhan sampiyan nang handak mandamaiakan ulun lalu mangawinakan wan Ruhana?” ujar Palui mulai buka suara karna marasa dituduh macam-macam wayah bailang ka rumah Ruhana itu.

“Buktinya ikam tatangkap wayah bailang saurangan malam hari di rumah Ruhana itu,” ujar katua RT.

“Bailang malam hari itu biasa haja, apalagi lampunya liwar tarang dan aku cuma bapapanderan baik-baik haja,” ujar Palui.

“Ikam dipadahakan katua RT ma-akal, ma-andak babarapa pasang sandal dan sipatu di palatar seulah-ulah bailang bakakawanan, jadi RT kada curiga,” ujar Pambakal maulangi lapuran RT.

“Oooooo... sual sandal wan kalum itukah? Tarus tarang haja Pambakal ai bahwa ulun kada tahu manahu wan sandal itu. Wayah ulun bailang itu sudah ada babarapa pasang sandal dan kalum di situ,” ujar Palui manjalasakan.

“Jadi itu sandal dan kalum siapa?” ujar katua RT.

“Ulun malah curiga Pambakal ai, karna sandal wan kalum itu ampun kawan ulun jua, yaitu ampun Garbus wan Tulamak,” ujar Palui manunjuk Garbus wan Tulamak nang tadiam karna tabuka rahasianya.

“Oooooo... kalu kaya itu ikam baduakah Bus nang tiga malam lalu bailang ka rumah Ruhana ini lalu bukah jalan balakang wayah ada ronda malam?” ujar katua RT mulai curiga.

Garbus wan Tulamak makin pucat bibirnya, karna bamaksud handak mangalahakan Palui sakalinya taungkai panyakitnya.

“Wah, wah wahhhhh... bubuhan ikam ini saling batitiwasan, padahal tujuannya sama maunting Ruhana si balu kambang si janda muda itu,” ujar Pambakal mangalakak tatawa umpat maniwas bubuhannya. (banjarmasinpost.co.id/rep/mht)