Si Palui : Ilat Tasilahu

Editor:  Alpri Widianjono

BANJARMASINPOST.CO.ID -Bulik matan Pamarangan si Palui membalantik manukar 10 butul madu wanyi.

“Haw...kanapa abahnya manukar madu babanyak-banyak. Kalu gasan di makan saurang, balabihan, mubazir abahnya-ai,” ujar nang bini manggarunum.

"Di Pahuluan itu harganya murah bangat, disini larang, apalagi madunya asli. Aku membalantik, malaran kawa manambahi panghasilan kita,” ujar Palui.

“Wan siapa abahnya ma-ambil madu ini?” bininya batakun handak tahu.

“Madu ini kutarima dari Aluh Pimping,” sahut Palui. “Ooo...jadi Aluh Pimping itu babinian lah abahnya?”

“Jalassai bibinian, ngarannya haja sudah Aluh, bukan Utuh,” jawab Palui lihum-lihum.

“Naaah...ini harus dicurigai,” ujar bini Palui mulai sarik. ”Balangganan madu wan Aluh Pimping...jangan-jangan...kalu abahnya bagandak wan inya,” ujar nang bini mangarikut giginya.

Palui mulai manyiapkan pertahanan nang sasain mamanas.

“Kaya ini umanya-ai bahwa si Aluh itu tarkanal disaluruh dairah Tabalong sebagai panjual madu asli, makanya dagangannya selalu laris manis. Kalu bisa aku menyarankan umanya, agar mau jua bamadu...ih...badagang madu nang kaya inya insya Allah kita bakalan sanang kaya inya. Sekaligus nama umanya tarsiar populir, wan miriknya Madu Bini Palui,"

Palui manaruskan pandirinnya.”Apabilia ikam hakun bamadu...ih, badagang madu, nang kaya Aluh Pimping, pasti kita nyaman dan makmur,” ujar Palui lihum-lihum.

“Nah, samakin kalihatan balangnya lalaki liur baungan,” ujar bininya. "Tarus tarang haja, abahnya-ai, manyuruh aku bajual madu kah, atawa manyuruh aku hakun dimadu? Mun aku hakun dimadu, artinya sampian babini lagi sa-ikung, alias bapoligami.” ujar bininya manciling, muhanya takarucut kaya tampuk guguling.

“Apa garang umanya, apa tasalahkah tadi aku bapandir?’

“Jangan pura-pura tasalah bapandir, abahnya-ai. Mimang singaja mamancing-mancing aku. Abahnya pura-pura ba-ucap, incaan ilat tasilahu, tapi nang bujurnya handak mambunguli bini,” ujar bini Palui mancarucus nang kaya sinapang mesin.

Dikuracaknya parut Palui sahingga inya takuringis kasikitan.