Si Palui : Suap Manyuap

BANJARMASINPOST.CO.ID - Kada habar dipahabar, mamarina Palui di pahuluan, julak Badul, diangkut ka rumah sakit karena dikuracak diigut warik.

Warik inguan sidin jua, sudah lima tahun disuapi disayangi, tapi tiba-tiba manyarang julak Badul.

Nah, itulah cuntuh gasan kita, bahwa soal suap manyuap ini banyak mudaratnya.

Julak Badul 5 tahun menyuapi warik akhirnya parak mati digasak warik, ujar Palui. Aah...itu warik lain manusia.
Binatang kada tahu batarima kasih, ujar Tuhirang umpat bapandir.

Baca juga: Waspada Bencana Akhir Tahun

Baca juga: Beberapa Hari Penting Bulan November 2021, Hari Brimob, Hari Pahlawan Hingga Ayyamul Bidh

Baca juga: Menjadi Teror di Masyarakat dan Arahan Jokowi, Kominfo Tutup Akses 4.906 Pinjol Ilegal

Amun manusia marasa disuapi, tahutang budi, pasti kahada purun mambalas wan kadurhakaan.

Tapi kita lihat jua suap menyuap di masyarakat manusia. Ada bamacam-macam kadar nilainya, ujar Palui pina panahunya.

Pertama suap manyuap pangantin waktu batatai di pelaminan, itu adalah suap cinta kasih.

Kedua, suap ibu, menyuapi anaknya, itu suap kasih sayang atau suap lillahi taala, ujar Palui.

Ketiga, suap perawat kepada pasiennya, itu suap perikemanusian.

Keampat, suapan rakyat jelata kepada patinggi, itu suapan mengharap sesuatu.

Kelima, suapan antara patinggi lawan patinggi, nang salalu di iringi wan bisik-bisikan, wan Senyum-senyuman, sidin-sidin haja nang mangarti. Kita-kita ini urang awam, kahada tahu makuanya.

Wallahu alam bissawab, ujar Palui nang kaya dusin mambari kuliah.

Umailah! ujar Garbus sambil manggawil Tuhirang.

Katua RT kita takana cerdas hari ini, Abang Palui sekarang lain dari Palui dahulu kan? ujar Garbus maambung.

Palui takarinyum, langsung manjawab. Pas tangguhan ikam, aku sudah umpat satudi banding kaluar daerah.

Makanya aku tahu hal suap manyuap ini, ujar Palui.

Kaya apa amun urang manulak suapan Lui ? Inya kada mau disuapi, ujar Tuhirang umpat batakun.

Aaah, itu pura-pura haja manulak, tapi muntungnya sudah banganga, kacar wan liurnya sudah batitikan ka dagu, ujar Palui pina musti.

Baaah...ngini manyindir aku, ujar Tulamak. Mentang-mentang aku gancang makan, aku kahada kapingin disuapi.
Kanapa kada kapingin? ujar Garbus lihum.

Aku gaer kalu aku mati konyol, lantaran si panyuap itu kada ikhlas, lalu dibuatinya racun. Hii...jauhakan bala, ujar Tulamak.

Kasimpulannya, kaya apa kalu kita sabarataan ini ka warung.

Di situ banyak disadiakan hidangan nang bisa disuap. Aku katua RT nang bayar, kaya apa? ujar Palui.

Akurrr..., sahut buhan lainnya sambil manaiki masing-masing sapida pancalnya, sapida cap onta. (aan/rep)