Kaliyangan Artis

BIASANYA Tuhirang kada banyak bapandir. Tapi wayah mahadapi masa-masa kampanye pamilu ini, inya mulai umpat marutit. Maklum haja lah, inya wahini sudah manjadi angguta partai nang pacangan umpat pamilu.

“Ikam umpat partai napa, Rang?” takun Palui di rumahnya. Tuhirang lalu babisik ka talinga Palui. Kaduannya lalu tatawaan, sama-sama maklum.

“Kalu partai lain banyak manempeli poster wan sapanduk-sapanduk, maka partai kami handak baulah cara lain yaitu manyiwa kapal tarbang atawa helikupter, gasan menyibarkan pamplit wan gambar-gambar artis itu kamasyarakat supaya labih dikanal,” ujar Tuhirang baagak.

“Umailah hibatnya partai ikam!” ujar Palui sambil maacungkan jempolnya.

“Mimang hibat, tapi tagantung duit biayanya kaya apa?” ujar Tuhirang.

“Kalo boleh aku bapandapat, panyibaran pamplit wan gambar-gambar artis pulitik melalui udara wan kapal, biaya mahal, balum tantu sibarannya sampai ke masyarakat. Kalu gugur ka hutan, ka rawa-rawa, ka danau, ka pahuman, kan sia-sia dan luput sasaran.”

Mandarar Tuhirang mandangar pandapat Palui itu.

“Kalu bulih aku manyarankan ka partai ikam”, ujar Palui.

“Kalu handak jua mangibarkan pamplit atawa gambar-gambar artis pulitik itu malalui udara, labih baik pakai kaliyangan, labih murah, mudah dan labih meriah, Rang ai!” ujar Palui.

“Nang kaya apa Lui?” takun Tuhirang.

“Gampang, kita bapuku ba-ulah banyak-banyak kalayangan, digambari atau ditimpili gambar artis unggulan itu, dibari tali banang atawa nilun. Amun ada angin capat-capat dinaikkan ka langit, Umai hibatnya, langit panuh bataburan artis. Amun ada nang pagat banang talinya, maka urang tuha wan kakanakan lalu rami kuciakan: Ayo...! kalayangan pagat, kalayangan pagat! “Kada usah mahadang pagat, cukup talinya dilapas haja, pasti urang gigir manyasahi. Kalu sangkut di puhun, buhannya itu wani bakayakat ma-ambil,” ujar Palui.

“Wah... Tarima kasih, usul ikam ini bagus banar, Lui-ai,“ ujar Tuhirang sambil manyalami Palui.

“Kada apa-apa, Rangai. Pukuknya gambar caleg sudah sampai ke masyarakat pamilih. Buhannya itu pasti ingat, gasan pancucukan di Pamilu kaina. Mudah-mudahan partai ikam suksis, tapi kalu bajanji saat kampanye, jangan kalumpanan, bisa-bisa jadi katulangan.... eh, salah katulahan,” ujar Palui mangalakak. (bpt/aan)