Si Palui: Mati Baimbai

NGARAN manusia hidup ada tingkatannya, matan bayi sampai jadi urang tuha, kai atau nini kenanya, kada kawa dipungkiri itu pasti akan terjadi pada satiap manusia.

Hari itu, Palui lihum sorangan sambil mambasuh bentor kesayangan.”Napa lihum saurangan Lui?” rawa Garbus.

“Aku kaganangan kaingatan Bus ai,” sahut Palui pina gambira banar inya.

“Kaganangan apa ikam Lui?” sahut Tulamak nang datang badua wan Garbus.

“Ya nang ngarannya hidup, waktu demi waktu iya kada, akhirnya tuha sasaurang manusia nitu, dahulu anum, montok, saraba kancangan, wayahni kariput, minta maaflah ulun kalu tasinggol pian nah?” sambat Palui.

“Ada kisahkah Lui? Parlu jua diungkai ka publik, supaya tahu banar ai, jadi kawa dicontoh?” takun Tulamak, asa suka Paluinya.

“Ungkai ja lakasi Lui ai, kena aku handak bejalan ka lain pulang?” sahut Garbus.

“Kisahnya sidin ni kai H Amun , sampai ka ka tuha tatap manuntut ilmu agama, kada tahu panas atau hujan tatap jua turun, kacuali garing hanyar kada turun,” Palui mulai bakisah.

“Sidin urang kampung mana Lui?” panasaran Tulamak.

“Kada usah kusambat, pukuknya ngaran kampungnya Kambang Hijau di hulu sungai naya jua, sidin dimana urang balajar kitab wan tuan guru, katuju umpat balajaran jua, maski sidin sudah tuha ada haja bekawan nang katuju balajaran kitab,” lanjut Palui lancar.

“Kitab napa haja nang sidin umpat balajaran nitu?” Garbus handak tahu.

“Kitab pikih, tauhid, tasawuf, saparti kitab Sabilal Muhtadin, Ihya Ulumuddin wan lainnya,” sahut Palui.

“Napa te lucunya sidin?” Tulamak manggayai Palui.

“Maklum sidin baudaan haja di rumah, anak buah sidin berumahtangga berataan sudah, kabatulan kadada nang paraknya lagi bagana pada sidin nitu, jadi jar kai H Amun aku handak mati baimbai haja,” rami Palui bakisah.

“Inya napa Lui?” Garbus bingung.