Malihat Landau

ZAMAN now wayahni dunia jadi rami karana ada dunia maya alias dunia medsos atau jar urang dunia internet. Banyak untung wan ruginya adanya dunia internet naya. Untungnya sagala habar di luar banua saparti di Jakarta atau di luar negeri kita lakas banar tahu, hitungan detik haja sudah sampai di layar hapi masing-masing. Tapi ada jua ruginya , banyak gambar porno batabaran di situs-situs nang dilarang dijanaki ulih nang di bawah umur. Tapi ngaran dunia panuh kebebasan masing-masing kakanakan kuting-kuting hapi, eh sakalinya katuju jua ai buhan kanakan malihat situs nitu.

”Napa Lui lihum ikam?” rawa Garbus.

“Kada ham aku ya, jadi lihum saurangan karana malihat landau atau batang paha binian tuha, binian anum, asa sigar mata jadinya,” ujar Palui sambil manutup ka hapinya.

“Siapa haja katuju malihat landau iya kalu Lui, apalagi liur baungan kaya ikam!” sahut Tulamak.

“Kada aku haja saku nang katuju, tapi sidin gin badiam-diam haja, kira-kira haja pang aku manangguh,” ucap Palui.

Karana bapander di teras masjid jadi ada tuan guru nang mandangar.

”Napa jar ikam te Lui?” takun tuan guru nang hanyar kaluar pada masjid.

“Biasa haja guru ai, ni kami mamander zaman now, banyak saku lakian nang katuju malihat landau binian tamasuk tuan guru iyakah guru?” Palui batarus terang.

“Uh damintukah ikam manangguhnya? Kalau aku sabagai guru kada handak pang malihat landau nitu, apalagi landau lain ampun bini kita, alias landau anak urang atau landau bini urang, aku muhun maaf lah!” ujar guru bijak.

“Inya napa guru?” Palui piragah kada paham.

‘Aku tuhuk salat lima waktu ditambah salat sunat lainnya, maka nang ngaran salatnya sampurna nitu pasti inya kada handak maulah kamungkaran atau barbuat dosa. Kaya nitu jua kalau malihat landau ya sama haja wan katuju barbuat dosa, aku minta maaf lah,” tuan guru lihum.

“Bararti ikam kada sampurna lah salatnya Lui, karana masih katuju malihat landau binian!” sambat Garbus.

“Bah iya pang , bararti harus betaubat , supaya salatku bujur-bujur diterima Allah Taala, kaya apa jalannya guru?” Palui betakun.

“Jalannya sutil haja, iya di antaranya ikam ampih balihat landau nitu, jaka mamutar tuan guru ceramah, atau nasyid islamikah atau hal-hal nang positif lainnya Lui ai, buhannya ai?” saran tuan guru.

“Kalau damintu Lui ai, baiknya ikam ampih haja bahapi,” sahut Tulamak.