Si Palui: Mancari Numur

ADA-ada haja kalakuan manusia matan zaman old sampai zaman now wayahni .”Apa masalahnya Lui jadi pina abut banar ikam?” takun Garbus.

”Masalahnya urang kahandakan sugih balampah di atas kuburan, dalam rangka mancari numur buntut supaya kana manimbaknya, iya kada? Hahaha..” Palui tatawa saurangan di ruang gardu sambil manuntun tv.

‘Dasar Lui lah ada hajasampai zaman now ni urang balampah di atas kuburan mancari numur buntut iya haja sudah. Dimana maandak akidah tauhid,?” sahut Garbus takijat Palui.

“Bujurkah Lui?” takun Tulamak jua.

“Aku malihat di tv jua pang, kadada di banua kita kalakuan nang kaya nitu, tapi di daerah seberang sana, kada usah kusambat nah, kena kana pencemaran nama baik,” sambat Palui pina takutan wayahni basasambat ka urang lain.

“Kalau wayahni memang kadada lagi pang di daerah hulu sungai naya, urang targila-gila wan buntut. Kalau zaman old alias bahari parnah aku lihat, sabalumnya tuhuk jadi abang becak, sidin ampih dahulu pahadangan mambeca karana kana buntut, timbakan jitu banar, puluhan juta dapat duit, kawa manukar sapida mutur, baalih profesi jadi tukang ujek, kaya apa parcayakah Lui, Bus?” sindir Tulamak nang mulai bakisah.

“Parcaya haja pang Mak ai, aku dasar tahu lagi bahari marajalela buntut di hulu sungai naya, sasarannya buhan tukang becak, tukang sayur, ya masyarakat bawah lah, nang rajin manukar buntut waktu itu,” Palui mambujurakan ujar Tulamak.

‘Sudah nitu pang, apalagi kisah ikam Mak?” takun Garbus handak tahu.

“Kada balanggar anam bulan, ampih jadi abang ujek, sakalinya sapida mutur paujekan nitu tajual , barang-barang di rumah, perabut rumah tangga jua dijualinya, karana ketagihan handak manukar buntut numur jitu banar, sayang bila kada manimbak,” lanjut Tulamak.

‘Sakalinya apa Mak?” takun Palui.

“Eh sakalinya timbakan luput tarus, maski manimbak sing banyakan, maka banyak jua duitnya manukar numur jitu, tajualan berataan harta hasil timbakan buntut nang kana dahulu, kembali jadi susah pulang urangnya,” Tulamak bisa banar bakisah.

“Makanya kada salah ujar Palui nitu ada urang balampah di atas kuburan pada malam kadap, tujuannya mancari wangsit kalu ada hantunya nang bakuriak manyabut numur buntut, iyakah Lui?” lanjut Tulamak.

“Iya banar saku, urang kapusangan hati, jadi akal sehat kada jalan lagi, asal pina talihat numur haja, disangka numur buntut,” ucap Palui bia manambahi.

“Wayahni istilahnya kupu Mak lah,” Garbus mamadahi buhannya.

‘Apa artinya Bus?” sahut Palui.